भैरहवा- रुपन्देही जिल्लाको सिद्धार्थनगर नगरपालिकामा सञ्चारकर्मी महिलालाई खोजमुलक समाचार लेखन तालिम सम्पन्न भएको छ।
सञ्चारिका समूह रुपन्देहीको आयोजना र सिद्धार्थनगर नगरपालिकाको सहयोगमा भएकाे तालिम शनिबार सम्पन्न भएको हो।
तालिममा सिद्धार्थनगर नगरपालिकामा भएका के-कस्ता विषयलाई समाचारको रुपमा उठान गर्न सकिन्छ भन्ने विषयमा छलफल भएको थियो।
तालिममा बोल्दै सिद्धार्थनगर नगरपालिकाकी उपप्रमुख उमा अधिकारीले अहिलेको समयमा महिलाको सहभागिता अधिक मात्रामा भएको भन्दै सहभागिता मात्र सहभागिता नभएर महिलाको अर्थपुर्ण सहभागिता हुनु आवश्यक रहेको बताइन्।
“महिलाई लैङिकताका आधारमा नभएर महिलाको काम र क्षमताको आधारमा मुल्याङ्कन हुन सके मात्र परिवर्तन सम्भव छ। त्यसको लागि महिला स्वयं जागरुक हुनु पर्छ। हरेक कुरामा मिडियाको भुमिका अतुलनीय रहेको छ। तालिममा सहभागी सबै संचारकर्मी महिलालाई तालिममा सिकेका कुरा मनन् गर्दै व्यवहारमा लागु गर्न समेत आग्रह गर्छु।” उनले भनिन्।
नगरपालिकाका सामाजिक विकास शाखा प्रमुख वरिष्ठ अधिकृत यादव प्रसाद सापकोटाले सिदार्थनगर नगरपालिकामा मात्र नभएर देशका तीनै तहका सरकारले विकासको क्रममा भौतीक पुर्वाधारलाई मात्रै प्राथमिकतामा राख्दा सामाजिक विकासमा कमी आएको बताए।
त्यस्तै लुम्बिनी प्रेस क्लबका संस्थापक अध्यक्ष माधव ढुङ्गानाले अहिलेको समयमा संख्यात्मक रुपमा सञ्चारकर्मीको वृद्धी भएको तर स्तरमा कमी आएकोले स्वच्छ पत्रकारिता गर्न सबैलाइ आग्रह गरे।
सञ्चारिका समुह लुम्बिनी प्रदेशकी अध्यक्ष एवम् प्रशिक्षक अमृता अन्मोलले आफु खटेर लागे मात्र पत्रकारिता जगतमा आफुलाई स्थापित गराउन सकिने बताउँदै समाचार लेखनलाइ निरन्त्ररता दिन सबैलाई आग्रह गरिन्।
तालिममा बिभिन्न सञ्चार गृहका सञ्चारकर्मी महिलाको उपस्थिती रहेको थियो।
सञ्चारिका समूह रुपन्देहीकी अध्यक्ष निरु गौतमको अध्यक्षतामा सम्पन्न कार्यक्रमको सञ्चालन सञ्चारिका समूह रुपन्देहीकी महासचिव अस्मिना पाण्डेले गरेकी थिइन्।