क्यानबेरा- वैज्ञानिकहरूको एक समूहले नाक कोट्याइरहने मानिसमा अल्जाइमर रोगको जोखिम अत्यधिक रहने एक अनौठो तथ्य पत्ता लगाएका छन्।
सन् २०२२ मा गरिएको यो अध्ययनबाट नाक कोट्याउने र अल्जाइमर विकसित हुने सम्भावनाबीच एक कमजोर तर प्रशंसनीय लिंक पत्ता लगाएको हो। बारम्बार नाक कोट्याइरहँदा आन्तरिक टिस्युमा नोक्सान पुग्छ। र, टिस्युमा लागेको चोटको माध्यमबाट ब्याक्टेरियाहरूले मस्तिष्कसम्म पुग्ने सहज मार्ग पाउँछन्।
र, त्यसबाट अल्जाइमर रोग विकसित हुन मद्दत पुग्ने वैज्ञानिकहरूको निष्कर्ष छ। तथापि, यो अनुसन्धान सीधा मानिसमा गरिएको होइन। मुसाहरूमा गरिएको अध्ययनबाट मानिसमा पनि यस्तै अवस्था उत्पन्न हुने निष्कर्ष वैज्ञानिकहरूले निकालेका हुन्। निकट भविष्यमै वैज्ञानिकहरूको टोलीले मानिसमा पनि यो अध्ययन गर्ने भएका छन्। त्यसबाट अल्जाइमर कसरी लाग्छ भन्ने गुत्थी सुल्झाउन ठूलो मद्दत पुग्ने उनीहरूको भनाइ छ।
अस्ट्रेलियाको ग्रिफिथ विश्वविद्यालयका वैज्ञानिकहरूको टोलीले क्लामिडिया न्युमोनिया नामक ब्याक्टेरियाको परीक्षण मुसाहरूमा गरेका हुन्। उक्त ब्याक्टेरियाले मानिसलाई पनि संक्रमित गर्छ। ती ब्याक्टेरियाले मुसाको घ्राण तन्त्रिता (नाक र मस्तिष्कमा रहने) सम्म पुगेको वैज्ञानिकहरूले पत्ता लगाएका छन्। त्यसबाट तन्त्रिकामा जटिल संक्रमण भएको थियो।
अध्ययनमा संलग्न न्युरोसाइन्टिस्ट जेम्स सेन्ट जोनका अनुसार क्लामिडिया न्युमोनिया नामक उक्त ब्याक्टेरिया नाकमार्फत मस्तिष्कमा पुग्ने पहिलोपटक पत्ता लागेको हो। र, त्यसले अल्जाइमरजस्तै प्याथोलोजी सेट गर्छ। ‘मुसामा गरिएको यो परीक्षण मानिसका लागि पनि त्रसित पार्ने प्रकृतिको छ,’ उनले भने।
उक्त ब्याक्टेरियाले २४ देखि ७२ घण्टाभित्र संक्रमण गरेको थियो। तथापि, मानिसमा परीक्षण नगरुन्जेल उक्त ब्याक्टेरियाले असर गर्छ कि गर्दैन भन्ने स्पष्ट भइसकेको छैन। त्यसैले मानिसमा यसको परीक्षण गर्न जरुरी देखिएको उनको भनाइ छ।
नाक कोट्याउनु मानिसका लागि सामान्य विषयजस्तो हो। हरेक १० मध्ये ९ जनामा नाक कोट्याउने आदत देखिने गरेको अध्ययनबाट पुष्टि भएको छ। नाकभित्रको रौं काट्ने आदतले पनि ती ब्याक्टेरियाको प्रवेश सहज बनाउने निष्कर्ष वैज्ञानिकहरूको छ।
अल्जाइमर निको नहुने एक जटिल बिमारी हो। त्यसैले विभिन्न कोणबाट यसबारे वैज्ञानिकहरूले अध्ययन जारी राखेका छन्। सोही अध्ययनको पछिल्लो कडी हो यो।
