सुनसरी- सप्तकोशी नदीमा बेपत्ता दुईजनाको शव शनिबार फेला परेको छ।
गत बुधबार सप्तकोशीमा डुबेर बेपत्ता भएका दुवै खोजी सशस्त्र प्रहरीको गोताखोर टोली र नेपाल प्रहरीले तीव्र बनाएका थिए। शनिबार उनीहरूको शव नदीमा फेला परेको हो।
झापाको दमक-९ बुद्ध चोकबाट बराहक्षेत्र-१ सप्तकोशी र कोका नदीको संगमस्थल बराहक्षेत्रमा बुवाआमासँग स्वर्गीय हजुरबुवाको श्राद्ध गर्न आएका नवीन न्यौपाने, रुद्र न्यौपाने र राज गुरागाईं (उर्लाबारी ७) सप्तकोशीमा पौडी खेल्ने क्रममा डुबेका थिए। नवीनको शव केही समयमै निकालिएको थियो, रुद्र र राज भने बेपत्ता थिए।
सशस्त्र प्रहरी पकलीबाट आएको गोताखोरको टोलीले सम्भावित ठाउँहरूमा निरन्तर खोजी गरिरहँदा शनिबार उनीहरूको शव भेटिएको हो।
रुद्रको शव आजै निकाली पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ। राजुको शव भने बराहक्षेत्र नगरपालिका-२ आठ आरडीस्थित नदीमा फेला परेको र नदीबाट गोताखोर टोलीले निकाल्ने तयारी गरिरहेको सशस्त्र प्रहरी बेस क्याम्प चतराका निरीक्षक देवेन्द्र रोक्काले जानकारी दिए। नदीमा डुबेर मृत्यु हुने तीनैजना फुपू-मामाका छोराहरू हुन्।