मोरङ– जनता समाजवादी पार्टी (जसपा) का अध्यक्ष उपेन्द्र यादवले प्रदेशको पुनः संरचना गरेर पहिचान र सामर्थ्यको आधारमा १० वटा अधिकारसम्पन्न प्रदेश बनाउने बताएका छन् । अध्यक्ष यादवले संविधान संशोधन गरी समानुपातिक र समावेशिता सच्याउने लक्ष्यका साथ अघि बढेको पनि बताए ।

पार्टीको प्रदेश १ स्तरीय अभिमुखीकरण कार्यक्रमलाई बुधबार विराटनगरमा सम्बोधन गर्दै यादवले भने, ‘राज्य पुनर्संरचना आयोगले दिएको प्रतिवेदनका आधारमा प्रदेशको सीमा परिमार्जन गरेर पहिचान र सामर्थ्यसहितका १० वटा अधिकारसम्पन्न प्रदेश निर्माण गर्छौं । देशका सबै जातिको समानुपातिक र समावेशी अधिकार प्रदान गर्ने लक्ष्य छ ।’

संघीय लोकतान्त्रिक गणतन्त्र नै नेपालको भविष्य भएको बताउँदै उनले ‘जनताको बलिदानले प्राप्त संघीय लोकतान्त्रिक गणतन्त्र समाप्त गर्न खोज्ने प्रतिगमनकारी शक्ति अझै विद्यमान रहेकाले सतर्क रहनुपर्ने बताए । उनले भने, ‘मुलुकमा अहिलेसम्म भएका हरेक आन्दोलनले परिवर्तन ल्याउँछ । तर, त्यो संस्थागत हुन सकिरहेको छैन । किनकी हरेक आन्दोलनले प्राप्त गरेको उपलब्धि उल्टयाउने प्रतिगमनकारी शक्ति रहिरहन्छ ।’

अध्यक्ष यादवले महन्थ ठाकुरलाई प्रधानमन्त्री बनाउन खोज्दा केपी ओलीको सहयोगी बन्न पुगेको टिप्पणी गरे । ‘सँगै हिँड्ने क्रममा केही व्यक्ति लड्कोले जसपालाई फुटेको भन्न मिल्दैन,’ उनले भने, ‘हाम्रै सदासयताले आएको दल विभाजनसम्बन्धी विधेयकले लडेर जसोतसो उठेका केही व्यक्तिहरुको सानो समूहले जनता र कार्यकर्ताबिनाको आज पार्टी दर्ता गराएको छ ।’