काठमाडौं– अफगानिस्तानबाट उद्धार भएका नेपाली स्वदेश फर्काउने प्रक्रिया जारी रहेको बेला राजधानी काबुलस्थित विमानस्थलमा ४२ जना नेपालीहरु उद्धारको प्रतीक्षा गरिरहेका सरकारले बताएको छ ।
कन्सुलर सेवा विभागको वेब पोर्टलमा सूचीकृत भई काबुलका विभिन्न स्थानमा समूहबद्धरूपमा उद्धारको पर्खाइमा रहेका ४२ जना नेपाली स्वदेश फर्कने क्रममा काबुल विमानस्थलमा उडानको प्रक्रियामा रहेका तर त्यहाँ नागरिक उड्डयन सेवाको जहाजको आगमन अवतरण हालसम्म खुलिनसकेको परराष्ट्र मन्त्रालयले बताएको छ ।
अफगानिस्तानबाट उद्धार भई दोहा, दुबई, लण्डन, र नयाँदिल्लीमा रहेका नेपालीलाई काठमाडौँ ल्याउनका निरन्तर समन्वय भइरहेको मन्त्रालयले आज साँझ विज्ञप्ति निकालेर जनाएको हो ।
मन्त्रालयले अफगानिस्तानमा नै रहेका र आफ्नो नाम दर्ता नगराएकाहरूलाई कन्सुलर सेवा विभागको वेबसाइटमा रहेको अनलाइन पोर्टलमा आफ्नो नामसहितको विवरण दर्ता गर्न सम्बद्ध सबैमा आग्रह गरेको छ ।
विद्रोही तालिबान लडाकुहरुले अफगानिस्तानमा कब्जा जमाएपछि बिभिन्न देशहरुले आफ्ना नागरिकहरुलाई त्यहाँबाट उद्धार गर्दै आएका छन् । नेपाल सरकारले पनि मित्र राष्ट्रहरुको सहयोगमा त्यहाँ रहेका नेपालीहरुलाई उद्धार गर्दै आएको छ । तालिबानले जतिसक्दो छिटो अफगानिस्तान छाड्न विदेशी नागरिकहरुलाई आग्रह गरेको छ ।