काठमाडौं- सरकारले कुलमान घिसिङलाई नेपाल विद्युत प्राधिकरणको कार्यकारी निर्देशकमा नियुक्त गरेको छ । ऊर्जा जलस्रोत तथा सिंचाइ मन्त्री पम्फा भुसालको उपस्थितिमा ऊर्जा सचिव देवेन्द्र कार्कीले बुधबार नियुक्तिपत्र दिएलगत्तै घिसिङले प्राधिकरणको कार्यालय पुगेर पद सम्हालेका छन् ।
पदभार ग्रहण गर्दै उनले ठूलो चुनौती स्वीकार गरेको बताए । उनले भने, ‘दोस्रो इनिङ स्वीकार गरेर मैले ठूलो चुनौती स्वीकार गरेको छु । यो मेरो जीवनकै सबभन्दा ठूलो चुनौती जस्तो लाग्छ ।’
प्रधानमन्त्री तथा मन्त्रिपरिषद् कार्यालय स्रोतका अनुसार प्राधिकरणका कार्यकारी निर्देशक हितेन्द्रदेव शाक्यलाई जल तथा ऊर्जा आयोगमा विशिष्ठ श्रेणीको पद (सचिव) सरहको पूर्णकालीन सदस्य पदमा पदस्थापन गरेर घिसिङलाई नेपाल विद्युत प्राधिकरणको कार्यकारी निर्देशक नियुक्त गरिएको हो ।
पहिलो कार्यकालमा घिसिङले लोडसेडिङ अन्त्य गरेको श्रेय दिने गरिएको छ । उनी फेरि प्राधिकरणमा आउँदा त्यहाँका कर्मचारीहरूले भव्य स्वागत गरेका थिए ।
भदौ ०७७ सम्म घिसिङ प्राधिकरणको प्रबन्ध निर्देशक थिए । केपी ओली नेतृत्वको सरकारले उनलाई अर्को कार्यकाल नथपेपछि घिसिङ प्राधिकरणबाट विदा भएका थिए ।
नयाँ सरकार गठन भएसँगै प्रधानमन्त्री शेरबहादुर देउबा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र ऊर्जा जलस्रोत तथा सिँचाइ मन्त्री पम्फा भुसालबीच घिसिङलाई फेरि ल्याउने सहमति भएको थियो ।