काठमाडौं- आज पनि मेघ गर्जन, चट्याङ र हावाहुरीसहित वर्षाको सम्भावना रहेकाले सतर्कता अपनाउन जल तथा मौसम विज्ञान विभागले आग्रह गरेको छ।
अहिले बिहान ६ बजे मौसम अलर्ट जारी गर्दै विभागले भनेको छ, ‘देशका पहाडी भूभागका थोरै स्थानमा मेघ गर्जन, चट्याङसहित हल्का वर्षाको सम्भावना रहेकाले मेघगर्जन, चट्याङ तथा हावाहुरीबाट हुन सक्ने क्षतिबाट बच्न आवश्यक सतर्कता अपनाउनु हुन अनुरोध छ।’
विभागका अनुसार अहिले नेपालमा स्थानीय र पश्चिमी वायुको प्रभाव छ। अहिले पहाडी क्षेत्रमा आंशिक बदली भई बाँकी इलाकामा मौसम सफा छ।
आज दिउँसो गण्डकी, कर्णाली र सुदूरपश्चिम प्रदेशका पहाडी भेगमा आंशिकदेखि सामान्य बदली रही बाँकी क्षेत्रमा मौसम सफा रहने छ। पहाडी क्षेत्रमा मेघ गर्जन र चट्याङसहित हल्का वर्षाको सम्भावना छ।
आज राति गण्डकी, कर्णाली, लुम्बिनी र सुदूरपश्चिमका पहाडी भेगमा सामान्य बदली रही अन्य क्षेत्रमा आंशिक बदलीदेखि मौसम सफा रहने छ। यस्तै, पहाडी क्षेत्रमा मेघ गर्जन र चट्याङसहित हल्का वर्षाको सम्भावना छ।