काठमाडौं- सरकारले राष्ट्रिय योजना आयोगको उपाध्यक्षमा डा. विश्वनाथ पौडेललाई नियुक्त गर्ने निर्णय गरेको छ ।
मंगलबार बसेको मन्त्रिपरिषद् बैठकले डा. पौडेललाई आयोग उपाध्यक्ष नियुक्त गर्ने निर्णय गरेको हो ।
डा. पौडेल अर्थशास्त्री हुन् । उनले अमेरिकाको निभर्सिटी अफ क्यालिफोर्निया (वर्कले)बाट अर्थशास्त्रमा विद्यावारिधि गरेका छन् । र, काठमाडौं विश्वविद्यालयमा एसोसिएट भिजिटिङ प्रोफेसरका रूपमा कार्यरत छन् ।
उनले अन्तर्राष्ट्रिय श्रम संगठन (आईएलओ)को आर्थिक सल्लाहकारका रूपमा काम गरेका थिए । बैंकमा निर्देशक र योजना आयोगमै आर्थिक सल्लाहकारको रूपमा काम गरेको अनुभव पनि उनीसँग छ ।
यस्तै, आयोगका सदस्यहरूमा मन्त्रिपरिषद्ले रामकुमार फुयाँल र दिलबहादुर गुरुङलाई नियुक्त गरेको छ ।
यस्तै, सरकारले गण्डकी र लुम्बिनीका प्रदेश प्रमुख परिवर्तन गरेको छ । गण्डकीका प्रदेश प्रमुख सीतादेवी पौडेललाई हटाएर पृथ्वीमान गुरुङलाई पठाइएको छ । यस्तै, लुम्बिनीका धर्मनाथ यादवलाई पदमुक्त गरेर अमिक शेरचनलाई जिम्मेवारी दिइएको छ । मन्त्रिपरिषद्को निर्णय कार्यान्वयन गर्दै राष्ट्रपति विद्यादेवी भण्डारीले पौडेल र यादवलाई पदमुक्त गरेकी छन् भने गुरुङ र शेरचनलाई नियुक्त गरेकी छन् ।
यसैगरी, सरकारले बलाधिकृत रथी प्रभुराम शर्मालाई कायममुकायम प्रधानसेनापति नियुक्त गर्ने निर्णय गरेको छ ।
प्रधानसेनापति पूर्णचन्द्र थापाले २४ भदौमा कार्यकाल पूरा गरी अनिवार्य अवकाश पाउँदैछन् । उनी अवकाशअघि एक महिना विदा बस्ने भएकाले बलाधिकृत रथी शर्मालाई भावी प्रधानसेनापतिका रूपमा कायममुकायम जिम्मेवारी तोकिएको हो ।