काठमाडौं- देशभरका एक हजार पाँच सयजनाको हस्ताक्षरसहित राष्ट्रिय जनता पार्टी (राजपा) नाममा नयाँ दल दर्ताका लागि निर्वाचन आयोगमा निवेदन दर्ता भएको छ।
जसपा अध्यक्ष महन्थ ठाकुर निकटस्थ समूहले पूर्वराजपाको नाममा दल दर्ता गराएको स्रोतको दाबी छ।
तत्कालीन संघीय समाजवादी पार्टी र राजपा एकीकरण भई जसपा गठन भएपछि राजपा स्वतः निश्क्रिय बनेको थियो। आयोगमा जसपा दर्ता भएको ठ्याक्कै वर्षदिनपछि राजपा दर्ता भएको हो।
१० वैशाख ०७७ मा संघीय समाजवादी पार्टी र राजपाबीच एकीकरण भएर जसपा गठन भए पनि निर्वाचन आयोगमा २४ असार ०७७ मा मात्र दर्ता भएको थियो।
नयाँ दलका अध्यक्ष हरिनारायण यादवले आयोगमा १५ सय ४८ दर्ता नम्बर प्राप्त भएको जानकारी दिए। धनुषाका यादवको अध्यक्षतामा २१ सदस्यीय केन्द्रीय कमिटी पनि गठन भएको छ । स्रोतका अनुसार यादव जसपा अध्यक्ष ठाकुरसँग निकट हुन्।
यादवका अनुसार चुनाव चिह्न ‘पञ्जा’ उपलब्ध गराउन आयोगमा दाबी पेश गरिएको छ।