दुबई- नेपालमा बढ्दै गइरहेको कोरोना महामारीको कारण युएई र नेपालबीच हवाई आवागमन बन्द भएपछि देश फर्कन नपाएर युएईमा अलपत्र परेका नेपालीको संख्या दिन प्रतिदिन बढ्दै गइरहेको छ। विभिन्न रोजगारीमा आएका र रोजगारी गुमाएका, भिजिट भिसामा आएका, कम्पनी बन्द भएर अलपत्र परेका नेपालीको संख्या बढ्दो छ।
हवाई आवागमन बन्द भएका कारण देश फर्कन नपाउँदा उनीहरूको भिसा सकिएर ओभर स्टे हुने र सोबापत दिन प्रतिदिन युएईको कानुनअनुसार जरिवाना पनि बढ्दै जाने हुँदा नेपाली समस्यामा परेका छन्। कति नेपाली कोरोनाका कारण देशमा भएको भयावहमा आफन्तहरू गुमाउनुपर्दा, घरमा समस्या हुँदा चाहेर पनि नेपाल जान पाएका छैनन्।
हवाई आवागमन बन्द भएपछि नेपाल फर्कन नपाएका र विभिन्न कारणले युएईमा समस्यामा परेका नेपालीलाई एनआरएन युएईले आश्रय दिएको छ। एनआरएन अन्तर्राष्ट्रिय समन्वय परिषदअन्तर्गत वैदेशिक रोजगार तथा कल्याणकारी विभागका संयोजक तथा उपाध्यक्ष डा. बद्री केसीको संयोजकत्वमा सञ्चालित राहत तथा उद्दार परियोजनाअन्तर्गत एनआरएन युएईले अहिले ६३ जना नेपालीलाई आश्रयदिइरहेको छ। विभिन्न रोजगारीमा आएका र रोजगारी गुमाएका, भिजिट भिसामा आएका, कम्पनी बन्द भएर अलपत्र परेका नेपाली आश्रय स्थलमा रहेका छन्। उक्त आश्रय स्थलमा पाँचजना महिला र बाँकी पुरुष छन्।
दुईजना तलबी स्वयंसेवक राखेर एनआरएनले समस्यामा परेका नेपालीका युएईमा गर्नुपर्ने कानुनी प्रक्रियामा सहजीकरण गर्ने दूतावाससँग समन्वय गर्ने गरेको एनआरएन युएईका कार्यबाहक अध्यक्ष निरञ्जन सिलवालले बताए। उनले आश्रयस्थलमा रहेको ६३ जना नेपालीमध्ये करिब ३० जनाको सम्पूर्ण कानुनी प्रक्रिया सकेर नेपाल फर्कन तयार रहेको तर हवाई यातायात बन्द भएका कारण उनीहरू फर्कन नसकेको बताए। उनले बाँकी व्यक्तिहरूको पनि काजगी प्रक्रिया सुरु भएको र उडान सुरु भए नेपाल फर्कन सक्ने बताए।
पर्वत जिल्ला ठूली पोखरीका सूर्यप्रसाद गौतम तीन वर्ष पहिले युएई आएका हुन्। एक क्याफेमा कामदार भिसामा युएई आएका उनी दुई वर्षसम्म उक्त क्याफेमा काम गरेपछि कम्पनी बन्द भएको थियो त्यसपछि उनी विना भिसा युएईमा आफैैँले काम खोजेर केही समय काम गरे। उनी एक वर्षदेखि विनाभिसा युएईमा छन्। पासपोर्ट पनि साथमा छैन। एनआरएन युएईको आश्रयमा आएर बसेका उनी कानुनी प्रक्रिया सकेर नेपाल फर्कन चाहन्छन्, तर उडान बन्द छ। उनी भन्छन्, ‘हरेक दिन जरिवाना बढिरहेको छ उडान खुले नेपाल कहिले पुग्न पाइन्छ भन्ने आशा छ।’
