काठमाडौँ – नेकपा एमालेका अध्यक्ष केपी शर्मा ओलीले राष्ट्रपतिको निर्वाचनपछि नेपाली कांग्रेस र एमालेबीच सहकार्य हुने सम्भावना भएको बताए ।
राष्ट्रपतिको निर्वाचनमा नयाँ बानेश्वरस्थित संघीय संसद भवनमा मतदान गर्न पुगेका अध्यक्ष ओलीले सञ्चारकर्मीहरुसँग कुरा गर्दै यस्तो बताएको हो । अध्यक्ष ओलीले राजनीतिमा जे पनि सम्भव हुने बताए । केही पनि सम्भव छैन भन्ने भनाइले सार्थकता पाउन सक्ने उनले बताए।
उनले संकीर्ण स्वार्थ बोकेकाहरुले सानो स्वार्थ पूरा भएन भनेर यसअघिको राष्ट्रपतिको मर्यादा नगरेको भन्दै राष्ट्रपतिय प्रणालीलाई नै मन नपराउने, जन्मिदै श्रेष्ट भनेर जस्तो भएपनि पुज्ने बानी परेका र संकीर्णताका काम गर्नेहरुले देशका लागि अडेर काम गरे भनेर बिरोध भएको उल्लेख गरे ।
उनले आगामी राष्ट्रपतिबाट देशकोहितको रक्षा, सार्वभौम सत्ताको रक्षा, भौगोलिक अखण्डताको रक्षा, राष्ट्रियहित र स्वाभिमानको रक्षा, लोकतन्त्रको रक्षा, जनताप्रति उत्तरदायी, संविधानको पक्षमा उभिने, संविधानको पक्षमा उभिनलाई आफ्नो स्वार्थमा व्याख्या गर्ने, त्यसलाई संविधानसम्मत लोकतान्त्रिक कोणबाट व्याख्या गर्ने, देशप्रति बफादार भएर संविधानको रक्षक र पालकको हिसाबले देशको अभिभावकको भूमिका बहन गर्न सक्ने राष्ट्रपतिको आवश्यक रहेको बताए।
अध्यक्ष ओलीले यसअघिका दुवै राष्ट्रपतिले उल्लेखनीय काम गरेको र राष्ट्रपति विद्यादेवी भण्डारीले झनै महत्वपूर्ण रुपमा काम गरेको दावी गरे।