वैशाख २६, वीरगञ्ज । वीरगञ्जमा सुपरस्प्यासिलिटी सेवासहितको अस्पताल सञ्चालनमा आएको छ ।

वीरगञ्ज महानगरका प्रमुख विजयकुमार सरावगीले आइतवार वीरगञ्जको बहुअरीमा स्पर्स सुपरस्प्यासिलिटी अस्पतालको उद्घाटन गरेका हुन् । 

सीमावर्ती शहर वीरगञ्जमा कोरोना संक्रमण बढेर उपचारमा कठिनाइ भइरहेका बेला अहिलेका लागि कोरोना संक्रमितको उपचारलाई प्राथमिकतामा राखिएको अस्पतालका अध्यक्ष डा महेश्वरप्रसाद कुर्मीले जानकारी दिए ।

अस्पताल उद्घाटन गर्दै नगर प्रमुख सरावगीले कोरोना महामारीको रुपमा फैलिएको अवस्थामा संक्रमितको उपचारलाई प्राथमिकतामा राखेर अस्पतालले सेवा शुरू गरेकोमा खुशी व्यक्त गरे । अस्पताललाई सहयोग र सहकार्यमा महानगर तत्पर रहेको पनि उनले उल्लेख गरे । 

वीरगञ्जमा विगत केही दिनदेखि कोरोना संक्रमणको उपचारका लागि अस्पतालहरूका बेड र अक्सिजनको अभाव देखिएको छ । यो अवस्थालाई केही हदसम्म भए पनि समाधानका लागि स्पर्स अस्पतालले अहिलेका लागि कोरोना संक्रमितको उपचारमा ४० ओटा बेड छुट्याएको डा कुर्मीले बताए । 

अस्पतालले दुई ओटा भेन्टिलेटर र तीन ओटा सीप्यापसहित १० ओटा बेडको आईसीयू, १३ ओटा बेडको एचडीयू तयार पारेको छ । सोमवारदेखि संक्रमितलाई भर्ना लिइने अस्पतालले जानकारी दिएको छ । 

वीरगञ्जका आठ जना युवा चिकित्सकहरूको समूहले अस्पताल सञ्चालनमा ल्याएको हो । ‘अहिले कोरोना संक्रमण बढिरहेकाले पहिलो प्राथमिकतामा यसको उपचारलाई नै राखिएको छ । निकट भविष्यमा अन्य सेवाहरू विस्तार गर्दै जाने योजना छ,’ डा कुर्मीले भने । 

आउँदो एक महीनाभित्रै मस्तिष्क तथा नशा रोग, पेटसम्बन्धी समस्या, बाल तथा नवजात शिशु रोग, मधुमेह, थाइराइड, मृगौला तथा मुत्रनली, हाडजोर्नी, महिला तथा प्रसुती समस्याको उपचार सेवा शुरू गरिने उनले बताए ।

मुटुरोग, नाक, कान घाँटीसम्बन्धी स्वास्थ्य समस्याको पनि उपचार सेवा उपलब्ध हुने अस्पतालले बताएको छ ।

 विशिष्ट स्वास्थ्य सेवा दिने उद्देश्यले सञ्चालनमा आएको यो अस्पतालले आवश्यकताअनुसार काठकाडौंलगायतका स्थानबाट चिकित्सक झिकाएर सेवा उपलब्ध गराउने योजना पनि बनाएको छ । क्यान्सरका बिरामीलाई केमोथेरापीको सेवासमेत उपलब्ध गराउने अस्पताल व्यवस्थापनले बताएको छ । आर्थिक अभियानबाट