काठमाडौं- नेपाल र बंगलादेशले ‘थ्री नेसन्स कप’ फुटबल प्रतियोगिताको उपाधिका लागि फाइनलमा प्रतिस्पर्धा गर्ने भएका छन्।
शनिबार सम्पन्न लिग चरणका अन्तिम खेलमा बंगलादेशसँग नेपालले गोलरहित बराबरी खेल्दै फाइनलमा स्थान बनाएको हो।
बंगलादेश भने यसअघि नै फाइनलमा पुगेको थियो। यससँगै किर्गिस्तान भने लिग चरणबाटै बाहिरिएको छ। पहिलो खेलमा बंगलादेशसँग १-० गोलले हारेको किर्गिस्तानले नेपालसँग भने गोलरहित बराबरी खेलेको थियो।
दशरथ रंगशालामा बंगलादेशविरुद्धको भएको खेलमा नेपालले गोल गर्ने राम्रो अवसर पाए पनि गोल गर्न नसक्दा बराबरीमा रोकिएको हो।
खेलको २१ औं मिनटमा त्रिदेव गुरुङको क्रसमा अन्जन बिष्टले गोल गर्ने अवसर पाएका थिए। तर, उनले गरेको हेड पोस्टभन्दा माथिबाट बाहिरिएको थियो।
खेलको २४ औं मिनटमा त्रिदेवले गोल गर्ने अवसर पाए पनि उनको प्रहार गोलपोस्टभन्दा निकै परबाट बाहिरियो। खेलको ४० औं मिनटमा जमल हुयाले प्रहार गरेको फ्रि-किक नेपालको गोलपोस्ट नजिकैबाट बाहिरिएपछि बंगलादेशले अग्रता बनाउने मौका गुमाएको थियो।
५५ औं मिनटमा रवि पासवानको स्थानमा सुनील बल र सन्जोक राईको स्थानमा विशाल राई मैदानमा प्रवेश गरे। खेलको ६५ औं मिनटमा रन्जित धिमालको क्रस पासमा अभिषेक रिजालले गोल गर्ने राम्रो अवसर पाए। तर, उनको हेड पोस्ट नजिकैबाट बाहिरियो।
खेलको ७१ औं मिनटमा अभिषेक रिजालको स्थानमा दर्शन गुरुङ र रञ्जित धिमालको स्थानमा निशान खड्कालाई मैदानमा प्रवेश गराइयो। यससँगै राष्ट्रिय टिमबाट निशानले डेब्यु गरे। खेलको ८७ औं मिनटमा अन्जन बिष्टको स्थानमा एरिक बिष्टलाई मैदानमा प्रवेश गराए पनि नेपालले गोल गर्न सकेन।
फाइनल खेल १६ चैतमा दशरथ रंगशालामा हुनेछ। प्रतियोगिताको विजेताले ५ हजार डलर र उपविजेताले ३ हजार डलर पुरस्कार पाउनेछन्। यस्तै, प्रतियोगिताका उत्कृष्ट खेलाडीलाई ५ सय डलर र हरेक खेलमा ‘म्यान अफ दी म्याच’ हुने खेलाडीले २ सय ५० डलर पुरस्कार दिइने छ।
