सुनसरी- शान्ति सिर्जना क्लबले प्रजातन्त्र दिवसको अवसरमा ६५ पिन्ट रगत संकलन गरेको छ।
दिवसका अवसरमा खुला रक्तदान कार्यक्रम प्रायोजक शान्ति सिर्जना परिवार बराहक्षेत्र–२ पुनर्वास तथा आयोजक नेपाल रेडक्रस सोसाइटी उपशाखा बराहक्षेत्र १–२ ले शान्ति सिर्जना परिवारको भवनमा रक्तदान कार्यक्रम आयोजना गरेको हो।
परिवारका लेखा संयोजक भिष्मराज घिमिरेका अनुसार भजन कीर्तनबाट शुरु भएको समूहले हाल आएर सामाजिक कार्यमा उल्लेखनीय कार्य गर्दै आफ्नै पहलमा जग्गा किनी दुईतले भवन निर्माण सम्पन्न हुने अवस्थामा छ।
विवाह, ब्रतबन्धजस्ता सामाजिक कार्यमा आवश्यक सामग्रीहरू, भाँडावर्तन, कुर्सी, पन्डाल समूहले सहुलियत दरमा उपलब्ध गराउँदै आएको छ। रगत अभावमा कोही बिरामीले अकालमा ज्यान गुमाउनु नपरोस् भन्ने उद्देश्यका साथ रक्तदान कार्यक्रम आयोजना गरिएको घिमिरेले जानकारी दिए।
समूहका सचिव अर्जुनकुमार कार्कीका अनुसार बाढी पीडित तथा विपन्नदेखि सम्पन्न (आर्थिक हैसियत) भएका परिवारको बसोबास भएको क्षेत्र भएकाले धार्मिक, सांस्कृतिक कार्यक्रमहरू, विवाहा, ब्रतबन्धलगायत कार्य, शहरीकरण भएको (सीमित घरजग्गा) व्यक्तिहरूलाई असजिलो अप्ठ्यारो भएमा उक्त भवन जग्गा उपलब्ध गराउँदै सामाजमा हुने भडकिलो (देखासिकी) खर्च न्यूनीकरण गर्ने सामाजिक र सांस्कृतिक जगेर्ना गर्न उल्लेखनीय भूमिका समूहले वहन गर्दै आएको छ।
भविष्यमा अझै सामाजिक गर्दै अगाडि बढ्ने लक्ष्य लिएको कार्कीले बताए। नेपाल रेडक्रस सोसाइटी उपशाखा बराहक्षेत्र १–२ का सभापति हरिकृष्ण भट्टराईले ६५ पिन्ट रगत संकलन भएको जानकारी दिए। रेडक्रसको धरानस्थित ब्लड बैंकको प्राविधिक सहयोगमा रक्तदान कार्यक्रम आयोजना गरिएको हो।