काठमाडौं- नेपाली राष्ट्रिय क्रिकेट टोलीका लेग स्पिनर सन्दीप लामिछाने पाकिस्तान सुपर लिग (पीएसएल) खेल्न पाकिस्तान पुगेका छन्। उनी शनिबार कतार एयरवेजको विमानमार्फत दोहा हुँदै पाकिस्तानको कराँची पुगेका हुन्।
उनले लाहोर कलन्दर्सबाट खेल्दैछन्। लामिछानेका व्यवस्थापक रमन शिवाकोटीका अनुसार शुक्रबार साँझ मात्र सन्दीपले पीएसएल खेल्ने पक्का भएको हो। लामिछानेलाई रासिद खानको ठाउँमा बाँकी खेल खेलाउने लाहोर कलन्दर्सले निर्णय गरेको हो।
जिम्बावेविरुद्धको टेस्ट र टी-२० सिरिजका कारण अफगानिस्तानी क्रिकेट खेलाडी खानले पीएसएलको बीचमै प्रतियोगिता छोड्नु परेको हो।
उनको स्थानमा लाहोरले लामिछानेलाई छनोट गरेको हो। यसअघि लामिछाने पीएसएलको ड्राफ्टमा सर्वाधिक महँगो प्लाटिनम श्रेणीमा थिए। उक्त ड्राफ्टमा नेपालबाट उनीसहित पूर्वकप्तान पारस खड्का, उपकप्तान दीपेन्द्रसिंह ऐरी, कप्तान ज्ञानेन्द्र मल्ल, करण केसी, कुशल मल्ल, अभिनास बोहरा, पवन सर्राफ, सुवास खकुरेल र आसिफ शेख समावेश थिए।
लाहोर कलन्दर्सले जारी प्रतियोगिताका तीन खेलमा दुईमा जित तथा एकमा हार बेहोरेको छ। लाहोर कलन्दर्स लिगको तेस्रो स्थानमा छ। लामिछानेले यसअघि सन् २०१९ मा पनि लाहोरबाटै खेलेका थिए। सन् २०२० मा भने उनले पीएसएल खेल्न पाएनन्।
