काठमाडौं- नेपाल वायु सेवा निगमका पाइलटको मासिक तलब २४ हजार रुपैयाँ मात्र छ।
निगमका ग्राउन्डेड चिनियाँ जहाजका पाइलटको सुविधा कटौती भएसँगै मासिक पारिश्रमिक २४ हजार मात्र भएको हो। जहाज नियमित उडानमा छँदा उनीहरूले ४५ घण्टा न्यूनतम उडान अवधिवापत भत्ता पाउँथे। त्यसवापत मासिक न्यूनतम ५४ हजार रुपैयाँ भत्ता पाउँथे।
१६ साउनदेखि निगमका ६ वटा चिनियाँ जहाज ग्राउन्डेड छन्। ती जहाज उडाउने निगमका १५ पाइलट कामविहीन बनेका छन्। जहाज ग्राउन्डेड भएकाले गत माघदेखि पाइलटहरूको मासिक भत्ता कटौती भएको हो।
मासिक भत्ता सुविधा कटौती भएसँगै निगमका पाइलटहरू आन्दोलित भएका छन्। निगमको यस्तो निर्णय मान्य नहुने उनीहरूको भनाइ छ।
जहाज उडाउनेतर्फ ध्यान नदिने निगम व्यवस्थापनले पाइलटलाई अन्यत्र अवसर पनि नदिएको उनीहरूले बताए। निगम व्यवस्थापन भने जहाड नउडेकाले पाइलटहरूलाई मासिक भत्ता र सुविधा दिइरहँदा अख्तियार दुरुपयोग अनुसन्धान आयोगको कारवाहीमा पर्ने जोखिम रहेको बताउँछ।