जनकपुर- सर्लाहीको हरिवन नगरपालिका-७ को वडाध्यक्षको मत पुनःगणना गर्न उच्च अदालत जनकपुरले आदेश दिएको छ।

अदालतले यसअघिको मत गणना रद्द गरिदिएको छ। उच्च अदालत जनकपुरका न्यायाधीशद्वय भोजराज अधिकारी र रेखा थापा पाण्डेको संयुक्त इजलासले पुनः मतगणनाका लागि आदेश दिएको हो।

३० वैशाखमा सम्पन्न पालिका चुनावमा वडाध्यक्षमा एमालेका नीरध्वज कार्की विजयी भएका थिए। त्यतिबेलाको गणनाअनुसार कार्कीले ३७९ मत ल्याएका थिए। उनका निकटतम प्रतिस्पर्धी कांग्रेसका टीकाजंग थापा (अशोक)ले ३७८ मत प्राप्त गरेका थिए।

कांग्रेसका थापाले तत्कालै पुनः मतगणनाको अन्तरिम आदेश माग गर्दै रिट दायर गरेका थिए। अदालतको आदेशपछि अब उच्च अदालतमै मतपत्र झिकाएर गणना गरिने भएको छ।