रुपन्देही– रुपन्देही जिल्लाको पक्लिहवा कृषि क्याम्पसमा अध्यननरत विद्यार्थीहरूले अध्ययनसँगै फूल खेती गरेका छन् ।
जिल्लाको भैरहवामा रहेको यस क्याम्पसले किताबी ज्ञान सगँसगै व्यवहारिक ज्ञानलाई पनि प्राथमिकता दिएको छ ।

क्याम्पसमा रहेको वाइ.सि.एस.ए नामक संस्थाले यस वर्ष फूल खेती गरेको छ । वि.सं २०१२ सालमा स्थापना भएको वाइ.सि.एस.ए संस्थाले विभिन्न कार्यक्रम गर्दै आएको छ ।

कृषि पढ्ने विद्यार्थीहरुलाई प्राविधिक रुपमा किसानहरूसँग जोड्नु नै संस्थाको मूल उद्देश्य रहेको संस्थाका सचिव तिलकराम भुषालले बताए । उनले भने, ‘कृषि पढ्दै गर्दा आफुले पढेको ज्ञान र व्यवहारिक ज्ञानमा हुने भिन्नता पहिचान गर्नका निम्ति फूल खेती गरेका हौँ ।’

संस्थाले तिहारलाई केन्द्रित गरेर फूल खेती गरेको थियो । तर, तिहारमा सोचे अनुरुप व्यापार गर्न सकेनन् । तिहारमा व्यापार सोचे जस्तो नभएपनि चुनाव र बिहेको लगनले फूल खेती फस्ट्याएको नवराज दवाडीले बताए ।

डेढ कट्ठा बाँझो जमिनलाई सदुपयोग गर्दै २५ हजार लगानीमा फूल खेती गरिएको छ । उक्त खेतीबाट लगानीको ३ गुणा नाफा भएको दवाडीले बताए । क्याम्पसले लक्षित गरेर च्याउ खेती, फूल खेती, भर्मि कम्पोस्ट लगायतका विभिन्न तालिमहरु सञ्चालन गर्दै आएको छ ।