सुनसरी- बराहक्षेत्र नगरपालिका–२ का जागृति चोक, सखुवागाछी, रेल्वेलाइन, १३ आरडी जाने सडक लामो समयदेखि नबनेपछि स्थानीयवासीले बाटो बन्द गरेका छन् । लामो समयदेखि सडक निर्माण नहुँदा सास्ती भोग्नु परेको भन्दै स्थानीयले बाटो बन्द गरेका हुन्।
मंगलबार ४ ठाउँमा स्थानीयहरूले ढाट लगाएर बाटो अवरुद्ध गरेका छन्। बाटो कालोपत्रे नभएसम्म ढाट यथावत् राख्ने स्थानीय धन विर दाहालले बताए । यसअघि नेपाली हेडलाइनमा १७ मंसिरमा प्रकाशित ‘कालोपत्रे अलपत्र बन्दा बराह क्षेत्रका बासिन्दाको सास्ती’ शीर्षकमा समाचार प्रकाशित भए पछि बराह क्षेत्रका नगर प्रमुख रमेश कार्कीले चासो लिँदै २० गते स्थलगत अनुगमन गरेका थिए।
अनुगमन क्रममा सडक मापदण्डअनुसार करम खोला पुलदेखि उत्तर जोरखम्बासम्म अन्दाजी ३०० मिटर लम्बाइमा ४ मिटर चौडा रहेको हुँदा उक्त बाटोमा दुई वटा सवारी साधन एकै साथ आउजाउ गर्न समस्या हुने र त्यसलाई ५ मिटर चौडा बनाउन पहल गर्ने कार्कीले स्थानीय बासिन्दाहरुलाई आश्वासन दिएका थिए।
उनले ठेकेदार पक्ष सम्पर्कमा आएको र २–३ दिन पछि सडक निर्माण शुरु हुने जानकारी दिएका थिए। साथै उनले चाँडोभन्दा चाँडो कालोपत्रे गर्न र मापदण्डअनुसार गुणस्तरीय बनाउन ठेकदार पक्षलाई मेयर कार्कीले निर्देशन दिएका थिए । तर मेयर कार्कीको निर्देशनलाई ठेकदार पक्षले सुनुवाइ गरेनन्। त्यसकारण स्थानीय बासिन्दाले आज फेरी दबाब स्वरूप बाटो बन्द गरेका हुन्।
उक्त बाटो पूर्व मेयर निलम खनालको पालामा ठेक्का सम्झौता भएको थियो। बराह क्षेत्र नगर पालिकाले ठेकेदार पक्षलाई बाटो बनाउन दबाब दिनुको साटो नगरको ट्याङ्करबाट अहिले आएर पानी छिट्ने कार्य गरी स्थानीय बासिन्दाहरूलाई अलमल्याउन खोजेको आरोप गोविन्द नेपालले लगाएका छन्।
ठेकदार पक्षले कालोपत्रे समयमा नगरिदिँदा स्थानीय बासिन्दामा धुलोका कारण श्वास प्रश्वास, रुघामर्गीलगायत रोगले सताउँदै आएको छ।खासगरी, वृद्ध वृद्धा, सुत्केरी, बालबालिका बढी प्रभावित भएका छन् भने धुलोले गर्दा दीर्घ रोग लागेर अकालमै मृत्युवरण गर्नुपर्ने जोखिममा स्थानीय बासिन्दा रहेका छन्।
