भैरहवा : सुनवल नगरपालिका लुम्बिनी प्रदेशको पूर्वी भागमा पर्ने नगरपालिका हो । नवलपरासी जिल्लामा अवस्थित रहेको यो नगरपालिका नेपालको प्रथम बालमैत्रीपुर्ण नगरपालिकाको रुपमा लिइने गरिन्छ । यो नगरपालिका वि.स २०७१ साल जेठ ४ गते नेपाल सरकारको स्थानिय प्रसासन अधिनियम अनुसार साविकका दुई गाविसहरु स्वाठी र सुनवल मिसाएर बनाइएको हो । यस नगरपालिका १३ वडामा विभाजित छ । ७३ हजार कुल जनसंख्या भएको यस नगरपालिकामा प्राय हिन्दु धर्मावलम्बीहरुको बसोबास रहदै आएको छ । सुसासन, न्याय, विकास र समान्ता समृद्ध नगर सुखी नगरवासी सुनवलको प्रतिबद्धता भन्ने मुल नाराका साथ सुनवल नगरपालिका अघि बढिरहेको छ।

जनताका साना तिना समस्या समाधान गरेपछि मात्र ठुला योजनामा हात हाल्ने स्थानिय तह कम नै हुन्छन् । स्थानिय तहमा होमीनु भनेको ठुलठुला काम गरेर चर्चा कमाउनु हो भन्ने मान्यताले जनताले सधै सास्ती खेप्नु परीरहेको छ । जनताका साना तिना समस्या समाधान गर्न भन्दा गरे जस्तो गरेर सामाजिक संजालमा ख्याती प्राप्त गर्नु कतिपय जनप्रतिनिधीको मन्साय छ । सुनवल नगरपालिकाको माहोल भने फरक छ । यस नगरपालिकामा प्रमुख निर्वाचित बिमला अर्यालले पनि जनताका साना तर महत्वपूर्ण समस्याको समाधानलाई प्राथमिक्तामा राखेकी छन् । अन्य पालिकाले झै महिला, स्वास्थ्य, शिक्षा, पर्यटनलाई समेत प्राथमिकतामा राखेको छ यस नगरपालिकाले।

नेपाल कृषि प्रधान देश भएकाले पालिकाले कृषि क्षेत्रलाई नै मुख्य प्राथमीक्ता दिएको नगर प्रमुख बिमला अर्याल बताँउछिन्। उनले पालिकाले कृषिमुलक तालिम सगँसगै बजारीकरणको लागि समेत नगरपालीका लाग्ने बताउँदै कृषि सँगै अन्य क्षेत्रमा समेत उत्तीकै विकाश गर्ने प्रतिबद्धता गरिन्।

कृषि शाखा प्रमुख सन्तोष कडेलले कृषि शाखामा शाखागत ५० लाख र वडागत ५५ लाख विनियोजन भएको र अहिलेसम्म ३५ लाखको हराहारीमा कार्यक्रम संचालन भएको बताए ।

त्यस्तै गरी यस क्षेत्रको शिक्षालाई नगरपालिकाले धेरै माथि उठाएको छ । यस क्षेत्रमा रहेका सरकारी विद्यालयको भौतिक संरचना देखि लिएर गुणस्तरीय शिक्षामा जोड दिएको छ । सरकारी विद्यालय प्रति नेपाली जनतामा रहेको नकरात्मक दृष्टिकोणलाई यहाँका सरकारी विद्यालयले सकरात्मक दृष्टिकोणमा परिणत गर्न सफल भएका छन् । जसमा नगरपालिकाको ठुलो योगदान रहेको छ । मानव विकासका लागि सबै भन्दा ठुलो कुरा नै शिक्षा हो । सुनवल नगरपालिकालाई शिक्षाको केन्द्र बनाउने उदेश्यमा लागेको शिक्षा अधिकृत पशुपती भट्टराईले बताए । हरेक ठाँउमा शैक्षिक गुणस्तरको कुरा सबै भन्दा पहिला आउने हुँदा शिक्षाको क्षेत्रमा कुनै कमी नहुने बताए।