काठमाडौं- प्रदेशसभातर्फको ३२८ निर्वाचन क्षेत्रमध्ये ३२७ को मतपरिणाम आइसकेको छ।
प्रदेशसभातर्फ ११० निर्वाचन क्षेत्रमा जित हासिल गर्दै कांग्रेस पहिलो दल बनेको छ। एमाले ९० स्थानमा जित हासिल गर्दै दोस्रो र ५३ स्थानसहित माओवादी तेस्रो दल बनेको छ।
सातै प्रदेशको परिणामअनुसार कांग्रेस अगाडि देखिए पनि प्रदेश–१ मा एमालेले आफ्नो बलियो पकड जमाएको छ। ५६ निर्वाचन क्षेत्र रहेको प्रदेशमा एमाले २४ निर्वाचन क्षेत्रमा निर्वाचित हुँदै पहिलो दल बनेको छ।
सत्ता गठबन्धन दल कांग्रेस १६ स्थानसहित दोस्रो स्थानमा रहँदा माओवादीले ९ र एकीकृत समाजवादीले ३ स्थानमा मात्र जित हासिल गरेका छन्। यस्तै, राप्रपा २ ठाउँमा विजयी भएका छन्।
प्रदेश–१ मा बलियो पकड जमाएको एमालेले मधेश प्रदेशमा पनि सो क्रम जारी राखेको छ । ६४ निर्वाचन क्षेत्र रहेको मधेश प्रदेशमा १५ स्थानमा जित हासिल गर्दै एमाले नै पहिलो दल बनेको छ। १३ स्थानमा निर्वाचित हुँदै कांग्रेस दोस्रो भएको छ।
मधेशी दलको वर्चस्व रहेको मधेश प्रदेशमा माओवादी केन्द्रलाई भने गठबन्धनमा रहे पनि जित निकाल्न मुस्किल प¥यो। एकीकृत समाजवादीले एक सिटमा पनि जित निकाल्न सकेन।
माओवादीले ४ सिट जित्दा सीके राउत नेतृत्वको जनमत पार्टीले ६ सिट जितेका छन्। जसपा ९, लोसपा ७ र स्वतन्त्र ६ स्थानमा विजयी भएका छन्।
मधेश प्रदेशमा साना राजनीतिक दलसँगै स्वतन्त्र उम्मेदवारले समेत राम्रै नतिजा निकाल्न सकेको देखियो।
वागमती प्रदेशमा भने २४ निर्वाचन क्षेत्रमा विजयी हुँदै कांग्रेस नै पहिलो दल बनेको छ। माओवादी केन्द्र १४, एमाले १३ र राप्रपाले ७ स्थानमा जित हासिल गरेका छन्। एकीकृत समाजवादी ५, नेमकिपा र हाम्रो नेपाली पार्टीले १–१ स्थान जिते।
६४ निर्वाचन क्षेत्र रहेको यस प्रदेशमा दोलखाको प्रदेशसभा ‘क’ को मतगणना जारी छ, जसमा माओवादी केन्द्रका गंगा कार्कीले १० हजार ४७२ मतका साथ अग्रता लिइरहेका छन्। एमालेका बालकृष्ण शिवाकोटी ९ हजार ३०५ मतका साथ पछ्याइरहेका छन्।
गण्डकी प्रदेशमा प्रतिनिधिसभातर्फ दोस्रो दल बनेको एमाले प्रदेशसभातर्फ पनि दोस्रो दल नै बनेको छ। गण्डकी प्रदेशमा १८ स्थानमा जित निकाल्दै कांग्रेस पहिलो दल बनेको छ।
एमाले १२ स्थानमा जित निकाल्दै दोस्रो बने। माओवादी केन्द्रले ४ र नेपाल समाजवादी पार्टी तथा स्वतन्त्रले १–१ स्थानमा जित हासिल गरेका छन्।
यस्तै, ५२ निर्वाचन क्षेत्र रहेको लुम्बिनी प्रदेशमा भने एमाले पहिलो बनेको छ। उसले १८ निर्वाचन क्षेत्रमा जित हासिल गरेको छ। कांग्रेसले १७ स्थानमा जित निकाल्दा माओवादीले ५ र जसपा २ ठाउँमा विजयी भए। यस्तै, नागरिक उन्मुक्ति पार्टी, लोसपा र राप्रपा २–२ ठाउँमा विजयी हुँदा जनमत पार्टीले १ र स्वतन्त्रले ३ स्थान आफ्नो पोल्टामा पारे।
कर्णाली प्रदेशमा सत्ता गठबन्धन अगाडि देखिएको छ। २४ निर्वाचन क्षेत्र रहेको कर्णालीमा कांग्रेस र माओवादीले बराबर जित निकालेका छन्। यी दुई दल ९-९ निर्वाचन क्षेत्रमा निर्वाचित भएका छन्। एमालेले ५ र स्वतन्त्रले १ स्थानमा जित हासिल गरेका छन्।
सुदूरपश्चिम प्रदेशमा भने एमाले खुम्चिएको छ। ३२ निर्वाचन क्षेत्र रहेको यस प्रदेशमा एमाले ३ निर्वाचन क्षेत्रमा मात्र जित हासिल गरेको छ। जब कि, नागरिक उन्मुक्ति पार्टीले ५ स्थानमा जित हासिल गरेको छ। कांग्रेस १२, माओवादी ८, एकीकृत समाजवादी ३ र स्वतन्त्र १ स्थानमा विजयी भएका छन्।