सुनसरी- बराहक्षेत्र नगरपालिका–२ का जागृती चोक, सखुवा गाछी, रेल्वेलाइन, १३ आरडी, जब्दी तथा वडा नम्बर ७ को सोमबारे हुँदै चक्रघट्टी, नगरपालिका कार्यालय जोड्ने सडक समयमा कालोपत्रे नहुँदा स्थानीय बासिन्दा सास्तीमा छन्।
कालोपत्रे गर्ने नाममा ठेकदार पक्षले बेस (गिटी) हाले पनि १० महिनादेखि कालोपत्रे नगरी बेवारिसे तरिकाले आधा काम गरेर सम्पर्कविहीन भएको स्थानीय बद्री दाहालले बताए। उनका अनुसार ठेकदार पक्षले समयमा कालोपत्रे नगरी दिँदा स्थानीय बासिन्दामा धुलोका कारण श्वास प्रश्वास, रुघामर्कीलगायत रोगले सताएका छन्। खासगरी, वृद्धवृद्धा, सुत्केरी, बालबालिका बढी प्रभावित भएका छन्।
‘कालोपत्रे गर्ने जिम्मा पाएको ठेकेदार कम्पनी कता हरायो ? हिउँदमा काम नगरेर कहिले गर्ने हो?’ स्थानीय युवा गोविन्द नेपाल प्रश्न गर्छन्, ‘सडक कालोपत्रे भए नभएको अनुगमन गर्ने जिम्मा कसको हो ? स्थानीय जनप्रतिनिधिहरू यो बाटोको बारेमा पशुपतिनाथ अगाडिको निर्जीव बसाहजस्तै मौन र मुकदर्शक भएर किन बसेका हुन्?’
ठेकेदार पक्षको ढिलासुस्तिका कारण धुलोले गर्दा दीर्घरोग लागेर अकालमै मृत्युवरण गर्नुपर्ने जोखिममा स्थानीय बासिन्दा छन्।
‘कुन कम्पनीले ठेक्का लिएको हो? कति बजेटमा ठेक्का पारेको हो? अनि कहिलेसम्ममा कालोपत्रे बनाइसक्नु पर्ने हो? सार्वजनिक सूचना होर्डिङ बोर्ड राख्नुपर्नेमा कहींकतै पनि ठेकदार पक्षले राखेको छैन, किन हो?’ स्थानीय सुभाष गौतम भन्छन्।
यो बाटोको बारेमा मेयरलगायत जनप्रतिनिधिलाई बारम्बार घचघच्याएको वडा नम्बर २ का निर्वाचित वडा सदस्य चुनु श्रेष्ठको भनाइ छ। ‘तर, उनीहरूले मेरो कुरा सुनेनन्, हामी सदस्य त थपना मात्र रहेछौं,’ उनले भनिन्।
यो सडकबारे स्थानीय बासिन्दाको तर्फबाट हस्ताक्षर संकलन गरी भोलि आइतबार बराहक्षेत्रका नगरप्रमुख रमेश कार्कीलाई भेटेरै ध्यानाकर्षण गराइने स्थानीय मनोज कार्कीले जानकारी दिए। एक साताभित्र समस्या समाधान गर्नेतर्फ नगरपालिका नलागेमा स्थानीय बासिन्दाहरू नगरपालिका घेराउलगायत विरोधमा उत्रिने उनले जानकारी दिए।