काठमाडौँ । ठूलो आवाज निकालेर चलाएको २९ ओटा मोटरसाइकललाई ट्राफिक प्रहरीले कारबाहीका लागि वातावरण विभाग पठाएको छ । जसमध्ये १२ ओटा मोटरसाइकललाई नगद १० हजार जरिवाना गरिएको छ ।
ठूलो आवाज निकालेर ध्वनि प्रदूषण गराउने २९ ओटा मोटरसाइकललाई ट्राफिक प्रहरीले नियन्णत्रमा लिएर आवश्यक कारबाहीका लागि वातावरण विभाग सिंहदरबार पठाएको प्रहरीले जनाएको हो ।
जसमध्ये १२ ओटा मोटरसाइकललाई वातावरण विभागले नगद १० हजार जरिवाना गराएको छ । वातावरण विभागद्वारा परीक्षण गर्दा मापदण्ड भन्दा बढी आवाज निकालेको पाइएकाले जरिवाना गराइएको हो । १७ ओटा मोटरसाइकलको सम्बन्धमा सोही विभागबाट आवश्यक अनुसन्धान भइरहेको छ ।
काठमाडौँ उपत्यका ट्राफिक प्रहरी कार्यालयबाट उपत्यकाका विभिन्न स्थानमा गरिएको विशेष चेकिङको क्रममा २९ ओटा ठूलो आवाज निकाल्ने मोटरसाईकललाई ट्राफिक प्रहरीले नियन्त्रणमा लिएको थियो ।
ठूलो आवाज निकालेर सवारी साधन चलाउँदा ध्वनि प्रदूषण हुनुका साथै मानवीय स्वास्थ्यमा असर पर्ने भएकाले त्यस्ता सवारी साधन नचलाउन काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी वरिष्ठ उपरीक्षक राजेन्द्र प्रसाद भट्टले सम्बन्धित सबैलाई अनुरोध गरेका छन् ।