काठमाडौं- बुथ कब्जा भएको प्रमाणित भएका दोलखाका १० वटा मतदान केन्द्रमा पुनः मतदान गराइने भएको छ।

४ मंसिरमा भएको मतदानमा बुथ कब्जा भएका तस्बिर, भिडियो सार्वजनिक भएका थिए। एमालेका उम्मेदवार बालकृष्ण शिवाकोटीले मुख्य निर्वाचन अधिकृतको कार्यालयमा उजुरी दर्ता गरेका थिए।

त्यसलगत्तै निर्वाचन आयोगले टोलीले दोलखा पुगेर स्थलगत अध्ययन गरेको थियो। सोही टोलीको सिफारिसका आधारमा आयोगले फेरि मतदान गर्न लागेको हो।

बैत्यश्वरको बैत्यश्वर मावि र वडा कार्यालय पीपलबोट, तामाकोशीको अमर मावि, शैलुङको नवीन मावि र मेलुङ ४ को जुके प्रावि मतदान केन्द्रहरू पुनः मतदान गराउन शिवाकोटीले माग गरेका थिए।

निर्वाचन आयोग स्रोतका अनुसार ती केन्द्रमा १५ मंसिरभित्र अर्को मतदान हुनेछ।