काठमाडौं- काठमाडौं–४ बाट २०७० र ०७४ मा निर्वाचित भएका कांग्रेस महामन्त्री गगन थापा तेस्रो पटक प्रत्यक्ष चुनाव जितेर सांसद हुने दाउमा मात्र नभएर देशको प्रधानमन्त्री नै बन्ने चाहना पालेर चुनावी मैदानमा उत्रिएका छन् ।
‘म यो पटक यहाँबाट सांसद भएर गएर नेपाली कांग्रेसको संसदीय दलको नेता लड्न चाहन्छु, जित्न चाहन्छु र कांग्रेसको संसदीय दलको नेता भएर यदि गठबन्धनले बहुमत प्राप्त गर्यो वा कांग्रेससँग बहुमत भयो भने कांग्रेसको तर्फबाट ड्राइभिङ सिटमा बसेर देशलाई अगाडि बढाउन चाहन्छु’ महामन्त्री थापाले एक टेलिभिजनमा दिएको अन्तर्वार्तामा भनेका थिए ।
उनले त्यस क्रममा आफू काठमाडौं–४ बाट यसअघि नै दुई पटक निर्वाचित भएर सांसदको अनुभव लिएको, मन्त्री भएको र अहिले पार्टीको जिम्मेवारीमा पनि भएको भन्दै मुलुकको समस्या र समाधानको उपाय पनि खोजेर आएको बताएका थिए । उनको चाहना पूरा हुन्छ वा हुँदैन, त्यो चुनावी मत परिणामले देखाउनेछ । तर, काठमाडौं–४ मा भने उनको वर्चश्व कायम छ । यस क्षेत्रमा उनी अत्यधिक रुचाइएका उम्मेदवार पनि हुन् ।
२०७४ सालको चुनावमा थापाले एमाले र माओवादी केन्द्र मिलेर बनेको वामगठबन्धनका साझा उम्मेदवारलाई पराजित गरेका थिए । त्यसैले पनि उनी यसपटक पनि चुनावमा सजिलै जित निकाल्न सक्ने आंकलन गर्न सकिन्छ । स्थानीय तहको निर्वाचनमा पार्टीको मत कम देखिए पनि संसदीय निर्वाचनमा थापा बलियो देखिएका कारण त्यस क्षेत्रमा उनको व्यक्तिगत प्रभाव राम्रो देखिन्छ ।
यसपटक थापालाई थप सजिलो हुनेछ । पहिलो त, यसपटक उनीतिर गठबन्धन छ । कांग्रेस, माओवादी केन्द्र, एकीकृत समाजवादी, जसपा र राजपाको गठबन्धन उनका लागि सहयोगी हुन्छ । त्यस्तो अवस्थामा उनको पक्षको मत नै १९ हजारभन्दा बढी हुन जान्छ ।
अर्कोतिर, पार्टीको अघिल्लो वर्ष सम्पन्न महाधिवेशनबाट उनी महामन्त्री निर्वाचित भएका छन् । त्यसले पार्टी राजनीतिमा उनको प्रभाव बढाएको छ नै, पार्टी बाहिर पनि छवि विस्तार गरेको छ । उनी सधैंभर युवामाझ चर्चा भइरहने नेता हुन् । चर्चा हुनु चुनावका लागि थप फाइदाजनक हुन्छ । काठमाडौं–४ थापाको राजनीतिक आधारभूमि पनि हो ।
स्थानीय तह निर्वाचनको मतपरिणाम
क्षेत्र काठमाडौं–४ मा महानगरपालिकाका १, ७, ८ र ३० वडाहरु पर्छन् । यस्तै, बुढानीलकण्ठ नगरपालिकाको १, २, ८, ९, १०, ११, १२, र १३ वडाहरु पर्छन् । जसअन्तर्गत पर्ने वडाहरुमा एमालेको वर्चस्व देखिन्छ ।
गत ३० वैशाखमा सम्पन्न स्थानीय तहको निर्वाचनमा यस निर्वाचन क्षेत्रअन्तर्गत पर्ने १२ वटा वडामध्ये कांग्रेसले केवल ३ वटामा वडाको मात्रै अध्यक्ष जितेको छ ।
कांग्रेसले काठमाडौं महानगरपालिकाका ७, ८, र ३० मा वडाध्यक्ष जितेको हो । बाँकी ९ वटा वडाको अध्यक्ष एमालेले जितेको छ । एमालेले काठमाडौं महानगरपालिकाको वडा नम्बर १ र बुढानीलकण्ठका १, २, ८, ९, १०, ११, १२ र १३ मा वडाध्यक्ष जितेको हो ।
वडाध्यक्षहरुले पाएको समग्र मत जोड्दा पनि एमालेले सर्वाधिक मत पाएको देखिन्छ । एमालेले १६ हजार ५०७, कांग्रेसले १५ हजार ७६७, एकीकृत समाजवादीले २ हजार ४१४, माओवादी केन्द्रले ८४४, राप्रपाले २ हजार २९३ र स्वतन्त्र उम्मेदवारले १ हजार २८ मत पाएको देखिन्छ । अन्य पार्टीको मत नगन्य देखिन्छ ।