काठमाडौं- आगामी ४ मंसिरमा हुने प्रतिनिधिसभा र प्रदेशसभा चुनावका लागि उम्मेदवारहरु आफ्नो चुनावी क्षेत्रभित्र रहेका गाउँ–टोलमा जनताको मत माग्न उनीहरुकै घर–आँगनमा पुगिरहेका छन् ।

१७ कार्तिकदेखि उम्मेदवारले खुला रुपमा चुनावी प्रचारप्रसार र आमसभा गर्न पाउने भएपछि शीर्ष नेता र उम्मेदवारहरु चुनावी माहोलमा निथु्रक्कै भिजेका छन् । गाउँ छिरेका उम्मेदवारले दोबाटो, चौबाटो, पानी पधेँरो, गोठाला ,ज्यालामजदुरी गरिरहेका सबै मतदातालाई खानेपानी, सडक, विधुत ल्याइदिने आश्वासन बाँड्न भ्याइसकेका छन् भने केही उम्मेदवारहरु स्वास्थ्य, शिक्षाका सपनाहरु बाँड्न थालेका छन् ।

चुनावी मैदानमा होमिएका उम्मेदवारले जित्ला कि नजित्ला भन्ने कुरा आ–आफ्नो ठाउँमा छ । अर्काेतर्फ जितेर गएपनि फेरि त्यसैगरी घरआँगनमा विकास ल्याएर फर्केलान त ? जनताले उनीहरुले बाँडेका सपना पत्याउन छाडिसकेका छन्् । तर, उम्मेदवारलाई जनताले के सोच्लान्, जनताले विश्वास गर्लान् भन्दा पनि उम्मेदवारलाई जनतालाई कसरी आफ्नो पक्षमा पार्ने र उनीहरुबाट मत प्राप्त गर्ने भन्ने हतार देखिन्छ । उम्मेदवारहरु जनताको नाडी छाम्न खेतबारीदेखि खाना पकाउने भान्सासम्म पुगेका छन् । उम्मेदवारले जस्तोसुकै आश्वासन बाँडे पनि जनताले आफ्नो क्षेत्रमा कस्तो विकास चाहेका छन् भनेर नेपाली हेडलाइनले घरदैलो अभियानमा हिँडिरहेका केही उम्मेदवारसँग बुझेकाे छ ।

चुनावी प्रचारप्रसारका लागि गृहजिल्ला संखुवासभा पुगेका सत्ता गठबन्धनबाट प्रतिनिधिसभा उम्मेदवार बनेका नेपाली कांग्रेसका नेता दीपक खड्का अहिले घरदैलो कार्यक्रममा व्यस्त छन् ।
जिल्लाको सबैभन्दा दुर्गम पालिका सिलिचोङ, सदरमुकाम केन्द्रित भएर खाँदवारी, भोटखोला, चिचिला र मकालु गाउँपालिकामा घरदैलोमा कार्यक्रम सम्पन्न गरिसकेका छन् । यस्तै, उनी बाँकी रहेका अन्य पालिकामा घरदैलो र चुनावी प्रचारप्रसार कार्यक्रममा व्यस्त छन् ।

जलस्रोत, पर्यटन र कृषि मुख्य आधार रहेको जिल्लाका मतदाताको पहिलो माग व्यवस्थित सडक रहेको उम्मेदवार खड्काले बताए । ‘अरुण जलविद्युत आयोजना, मकालु हिमाल, किमाथांकाजस्ता पर्यटकीय सम्भावना बोकेको स्थल र प्रचुर मात्रामा कृषि उत्पादन हुने फाँटहरु, जडीबुटीको भण्डार रहेको जिल्ला हो, संखुवासभा । यी सबै सम्भावनाको दिगो विकास, उपभोग, विस्तार र विकासका लागि सडक नै मुख्य आधार भएकाले यहाँका नागरिकको माग पनि सडक रहेको छ’, उनी भन्छन् ।

यस्तै, चुनावी वातावरण आफ्नो पक्षमा बनाउनका लागि चुनावी मैदानमा होमिएका अर्का उम्मेदवार हुन्, योगेश भट्टराई । उनी ताप्लेजुङ जिल्लाबाट प्रतिनिधिसभा सदस्यका उम्मेदवार हुन् । उनी पनि अहिले घरदैलो कार्यक्रमसँगै मतदाताहरूको अपेक्षा र विकास निर्माणका मागहरु सुन्न र बुझ्न व्यस्त छन् । उनका अनुसार घरदैलो कार्यक्रममा ताप्लेजुङवासीसँग भेटेर कुराकानी गर्दै गर्दा मतदाताले बाह्रै महिना सञ्चालन हुन सक्ने सडक निर्माणमा अग्रसरता देखाउन सुझाव दिएको बताए ।

‘यसअघिकै कार्यकालमा गाउँ–गाउँमा सडक पु¥याइसकेको छु । तर, स्तरोन्नती हुन नसक्दा ती सडक बाह्रैमास सञ्चालनयोग्य बनाउन सकिएको छैन’, उनी भन्छन् ‘र, मतदाताले पनि आफ्नो घर गाउँ जोड्ने सडक बाह्रै महिना सञ्चालन गर्न योग्य बनाइदिन आग्रह गर्नुभएको छ ।’ सडक बाहेक ताप्लेजुङवासीले ताप्लेजुङको मुख्य नगदे बाली अलैंचीको बजारीकरणमा साथ दिन आग्रह गरेका छन् । खासगरी उनीहरुले अलैंचीको बजार किसानको हितमा हुनुपर्ने माग राखेका छन् ।

यता रामेछाप जिल्लाबाट प्रतिनिधिसभा सदस्यका उम्मेदवार बनेका नेपाली कांग्रेसका नेता पूर्णबहादुर तामाङ (कान्छाराम)ले मतदाताको घरदैलोमा पुग्दा उनीहरुले सड्क, विद्युत, सञ्चार, शिक्षा, स्वास्थ्य लगायत विकास निर्माणको माग गरेको बताउँछन् ।

उम्मेदवार तामाङ ०७४ सालको निर्वाचनमा प्रतिनिधिसभा सदस्यकै उम्मेदवारमा पराजित भएका थिए । आफू पराजित भएर पनि निर्वाचनको वेला जनतासँग गरेको वाचा व्यक्तिगत खर्चमै पुरा गरेकाले अब निर्वाचित भएर आफूले अझै गर्न बाँकी रहेको कामहरु पुरा गर्ने तामाङले जानकारी दिए ।

रामेछाप राजधानीदेखि नजिककै जिल्ला भएपनि जिल्लाको उत्तरी भेग र अन्य ठाउँहरु दुर्गम नै छन् । तामाङका अनुसार कृषि, पर्यटन, जलविद्युत, जडीबुटी, फलफुलको प्रचुर सम्भावना रहेको जिल्लामा यी क्षेत्रहरुको विकास र विस्तार गरी जनताको आर्थिक स्तर उकास्ने खालका कार्यक्रमहरु सञ्चालन गर्नेतर्फ ध्यान दिन जनताले सुझाएका छन् ।