काठमाडौं- काठमाडौं महानगरपालिका-६ बौद्ध अरुणिमा स्कुल पछाडी सडकमा बागमती प्रदेश ०२-०२२ प ४६०४ नम्बरको स्कुटर र इलेक्ट्रोनिक स्कुटर एकआपसमा ठोक्किएर मंगलबार दिउँसो दुर्घटना हुँदा इलेक्ट्रिक स्कुटरमा सवार हाल वतन नखुलेका ३० वर्षीय सुदिप बिजय तामाङको मृत्यु भएको छ । दुर्घटनामा गम्भीर घाइते भएका उनको वीर अस्पतालमा उपचारको क्रममा मृत्यु भएको हो । साथै दुर्घटनमा घाइते भएका बागमती प्रदेश ०२-०२२ प ४६०४ नम्बरको स्कुटरमा सवार दुई जनाको  चावहिलस्थित हेल्पिङ ह्याण्ड अस्पतालमा उपचार भइरहेको छ भने इलेक्ट्रिक स्कुटर चालकको वीर अस्पतालमा उपचार भइरहेको छ ।

चितवन रत्ननगर नगरपालिका-९ त्रीनेत्र पेट्रोल पम्पस्थित सडकमा ना.८ ख २५५५ नम्बरको ट्याङकरले ना.३५ प ८७५६ नम्बरको मोटरसाइकललाई मंगलबार साँझ ठक्कर दिँदा मोटरसाइकल चालक झापा घर भई मकवानपुर हेटौंडा उपमहानगरपालिका-११ सरस्वती टोल बस्ने २६ वर्षीय सुमन लुईटेलको घटनास्थलमै मृत्यु भएको छ । साथै दुर्घटनामा घाइते भएका मोटरसाइकलमा सवार सुमनकी छोरी ९ वर्षीया सोभानी लुईटेललाई उपचारको लागी नयाँ मेडिकल कलेज भरतपुर पठाइएको छ । ट्याङकर चालकलाई प्रहरीले नियन्त्रणमा लिएको छ ।

धादिङ गजुरी गाउँपालिका-१ गजुरीबजारमा एमएच ०१ सीडब्लु ५९७१ नम्बरको मोटरसाइकलको ठक्करबाट पैदलयात्री सोही गाउँपालिका-१ नयाँबारी बस्ने ७९ वर्षीय सुर बहादुर धितालको मंगलबार साँझ मृत्यु भएको छ । ठक्करबाट गम्भीर घाइते भएका उनको प्राथमिक स्वास्थ्य केन्द्र गजुरी हुँदै थप उपचारको लागि काठमाडौंतर्फ लैजाने क्रममा बाटोमै मृत्यु भएको हो । साथै घाइते भएका मोटरसाइकल चालकलाई उपचारका लागि काठमाडौं पठाइएको छ ।

उदयपुर बेलका नगरपालिका-१ सर्वन चोकमा प्रदेश १-०२०४६ प ४५३५ नम्बरको मोटरसाइकल अनियन्त्रित भई मंगलबार साँझ दुर्घटना हुँदा चालक सोही नगरपालिका झाखेर बस्ने ३५ वर्षीय धन बहादुर तामाङको मृत्यु भएको छ । दुर्घटनामा गम्भीर घाइते भएका उनको स्वास्थ्य चौकी कन्चनरुपमा उपचारको क्रममा मृत्यु भएको हो ।

यसैगरी उदयपुर कटारी नगरपालिका-११ स्थित सडकमा अन टेष्ट लेखिएको मोटरसाइकल अनियन्त्रित भई मंगलबार साँझ दुर्घटना हुँदा चालक सोही ठाउँ बस्ने २४ वर्षीय यम्बर बहादुर श्रेष्ठको घटनास्थलमै मृत्यु भएको छ । साथै दुर्घटनामा घाइते भएका मोटरसाइकलमा सवार  सोही ठाउँ बस्ने २१ वर्षीया ईन्दिरा कार्कीलाई उपचारको लागि कटारी अस्पताल पठाइएको छ ।      

मकवानपुर हेटौंडा उपमहानगरपालिका-१८ रामधुनी चोकमा हाल नम्बर नखुलेको मोटरसाइकलको ठक्करबाट पदैलयात्री सोही ठाउँ बस्ने ३५ वर्षीय बिनोद रमतेलको मंगलबार साँझ मृत्यु भएको छ । ठक्करबाट गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । हाल मोटरसाइकल सहित फरार चालकको प्रहरीले खोजी गरिरहेको छ ।

रुपन्देही सैनामैना नगरपालिका-१ बनकट्टामा लु.२ च १५१३ नम्बरको गाडीको ठक्करबाट पैदलयात्री बुटवल उपमहानगरपालिका-११ देबीनगर बस्ने ४२ वर्षीय धन बहादुर बिकको मंगलबार साँझ मृत्यु भएको छ । ठक्करबाट गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । गाडी चालकलाई प्रहरीले नियन्त्रणमा लिएको छ ।

दैलेख भैरवी गाउँपालिका-३ डाँडीमाडी बजारमा भे.१ क १६४२ नम्बरको जेसीबीको ठक्करबाट पदैलयात्री सोही गाउँपालिका-३ डाँडीमाडी बस्ने ३९ वर्षीय धनि मियाँको घटनास्थलमै मंगलबार साँझ मृत्यु भएको छ । जेसीबी चालकलाई प्रहरीले नियन्त्रणमा लिएको छ ।

कपिलवस्तु शिवराज नगरपालिका-१ उमरीमा ना.६ ख ४७०४ नम्बरको बसबाट खसेर सोही बसका सहचालक हाल वतन नखुलेका करिब ४२ वर्षीय सुधिर न्यौपानेको मंगलबार बिहान मृत्यु भएको छ । यात्रु चढाई बसमा चढ्ने क्रममा ढोकाबाट खसेर टायरले किच्दा गम्भीर घाइते भएका उनको संजिवनी सामुदायिक अस्पताल चन्द्रौटामा उपचारको क्रममा मृत्यु भएको हो । बस चालकलाई प्रहरीले नियन्त्रणमा लिएको छ ।

मोरङ कानेपोखरी गाउँपालिका-६ स्थित ग्रामिण सुधार सामुदायिक बनमा प्रदेश १-०२-००३ त १५८७ नम्बरको ट्रयाक्टर खोल्सामा खसेर मंगलबार बिहान दुर्घटना हुँदा ट्रयाक्टर चालक कानेपोखरी गाउँपालिका-४ बस्ने ५० वर्षीय ज्ञान बहादुर लुङ्गेली मगरको मृत्यु भएको छ । दुर्घटनामा गम्भीर घाइते भएका उनको बिपि कोईराला स्वास्थ्य बिज्ञान प्रतिष्ठान धरान घोपामा उपचारको क्रममा मृत्यु भएको हो ।