काठमाडौँ । आचार संहिता उल्लंघन गर्दै खानेपानी मन्त्री तथा नेपाली कांग्रेसका सहमहामन्त्री उमाकान्त चौधरीले चुनावी प्रचारप्रसारका निम्ति सरकारी गाडीको दुरुपयोग गरेको पाइएको छ ।
बारा क्षेत्र नम्बर १ मा सत्ता गठबन्धनका तर्फबाट प्रतिनिधिसभाका उम्मेदवार मन्त्री चौधरीले बाराको क्षेत्र नम्बर १ मा चुनावी प्रचार प्रसारका निम्ति सरकारीले मन्त्रीलाई दिएको गाडीको नम्बर नै परिर्वतन गरी प्रयोग गरिएको पाइएको हो ।
मन्त्री चौधरीले रातो निलो रंग भएको बा २ झ ५८६१ नम्बरको सरकारी गाडीको नम्बर प्लेट परिवर्तन गरी बा १२ च ७४३१ नम्बरको प्लेट राखेर प्रयोग गर्दै आएका हुन । बारा जिल्ला घर भएका मन्त्री चौधरी कोही हप्तादेखि बारामै छन् ।
उनले चुनावी प्रचार प्रसारका निम्तिसमेत सरकारी गाडी प्रयोग गर्दै आएको एक स्थानीय राम एकबाल चौधरीले बताए । “मैले पहिले मन्त्री ज्युको यही गाडीमा सरकारी नम्बर देखेको थिएँ, विगत तीन चार दिनबाट निजी नम्बर देखे”, चौधरीले भने, ‘प्रहरी नै मन्त्रीसँग अघिपछि हुन्छ प्रशासन मौन छ, कसले कारबाही गर्ने खै ?’
निर्वाचन २०७९ प्रयोजनका लागि जारी भएको आचारसंहितामा नेपाल सरकार, प्रदेश सरकार, मन्त्री, स्थानीय कार्यपालिका तथा पदाधिकारीले कुनै पनि राजनीतिक दल वा उम्मेदवारको पक्ष विपक्षमा प्रचारप्रसारमा संलग्न हुन वा प्रचारप्रसार गर्न नपाइने उल्लेख गरिएको छ ।
यसअघि स्थानीय तहको निर्वाचनमा समेत उनले आचारसंहिता उल्लंघन गर्दै चुनावी प्रचार प्रसारका निम्ती सरकारी गाडीको दुरुपयोग गरेका थिए ।