काठमाडौँ । अमेरिकी डलरको मूल्यले नयाँ रेकर्ड बनाएको छ । नेपाल राष्ट्र बैंकका अनुसार बिहीबार एक डलरको बिक्रीदर १३२ रुपैयाँ ५४ पैसा कायम भएको छ ।
खरिददर पनि १३३ रुपैयाँ १४ पैसा कायम भएको छ । जुन हालसम्मकै उच्च बिन्दु हो ।
यसअघि बुधबार एक डलरको बिक्रीदर १३२ रुपैयाँ ०८ पैसा कायम भएको थियो । यस्तै, खरिददर पनि १३१ रुपैयाँ ४८ पैसा कायम भएको थियो । बुधबारको तुलनामा बिहीबार डलरको मूल्य १ रुपैयाँ ०६ पैसाले बढेको हो ।
त्यस्तै, आज युरोको बिक्रीदर १३० रुपैयाँ २४ पैसा छ भने खरिददर १२९ रुपैयाँ ६५ पैसा रहेको छ । पछिल्लो समय डलर मजबुत बन्दा अन्य मुद्रामा दबाब परेको छ । डलरको तुलनामा भारतीय मुद्रा इतिहासकै कमजोर बनेको छ ।
भारुसँग नेरुको स्थिर विनिमय दर कायम भएकाले भारु कमजोर हुँदा नेपाली रुपैयाँ कमजोर हुने गर्छ । विशेषगरी, अमेरिकी केन्द्रीय बैंक फेडरल रिजर्भले मूल्य वृद्धि नियन्त्रणका लागि ब्याजदरमा निरन्तर वृद्धि गरेपछि डलर मजबुत बनेको छ ।
यसले विकासशील राष्ट्र तथा नेपाल जस्ता आयातमुखी अर्थतन्त्र भएका देशहरूको अर्थतन्त्रमा दबाब सिर्जना गरेको छ । डलर मजबुत हुँदा निर्यात महँगो पर्छ भने वैदेशिक ऋणको लागत पनि बढ्छ । तर, विदेशबाट रेमिटेन्स पठाउनेलाई फाइदा हुन्छ ।