काठमाडौँ । आगामी मंसिर ४ गते हुने प्रतिनिधिसभा सदस्य निर्वाचनका लागि ३० वर्षभन्दा कम उमेरका १७३ जनाले उम्मेदवारी दिएका छन् । विभिन्न पार्टी तथा स्वतन्त्र रुपमा उनीहरूले उम्मेदवारी दिएका हुन् ।

निर्वाचनका लागि प्रदेश १ का १४ जिल्लाबाट युवा अर्थात ३० वर्षभन्दा कम उमेरका उम्मेदवारहरू २३ जना रहेका छन् । जसमा उदयपुर, संखुवासभा, उदयपुर, भोजपुर, ओखलढुङगा र तेह्रथुमका सबै उम्मेदवार ३० वर्षभन्दा माथिका रहेका छन् ।

उम्मेदवारी परेका अन्य जिल्लामा ताप्लेजुङबाट १ जना, इलामबाट १ जना झापाबाट ४ जनाको उम्मेदवारी परेको छ भने धनकुटा र मोरङ्गबाट ८ जनाको उम्मेदवारी परेको छ ।

प्रदेशको एकको अर्को जिल्ला सुनसरीबाट ५ जनाको उम्मेदवारी परेको छ भने सोलुखुम्बु र खोटाङ एक–एक जनाको उम्मेदवारी परेको छ ।

यस्तै, मधेश प्रदेशको ८ जिल्लामा सप्तरीबाट ४ जनाको उम्मेदवारी परेको छ । सिरहाबाट ९ जना उम्मेदवारी दर्ता हुँदा धनुषाबाट १५ जनाको उम्मेदवारी परेको छ । यीमध्ये धनुषा २ बाट राष्ट्रिय स्वतन्त्र पार्टीका २६ वर्षीय चनशेखर कुमार यादवको उम्मेदवारी परेको छ । अन्य स्वतन्त्र उम्मेदवार हुन् ।

महोत्तरीबाट ८ जनाको उम्मेदवारी परेको छ । सर्लाहीबाट ९ जना र रौतहटबाट १४ जना उम्मेदवारी दर्ता हुँदा बारा र पर्साबाट १० जनाले उम्मेदवारी दिएका छन् ।

यस्तै, देशको संघीय राजधानीसमेत रहेको बागमती प्रदेशबाट रामेछाप र मकवानपुरबाहेक अन्य जिल्लामा ३० वर्षभन्दा कम उमेरका उम्मेदवार छन् ।

जसमा दोलखाबाट १ जना, सिन्धुलीबाट ४ जना, रसुवा र धादिङबाट ५ जनाको उम्मेदवारी परेको छ । नुवाकोटबाट ८ जनाको उम्मेदवारी दर्ता हुँदा काठमाडौँबाट १२ जना, भक्तपुर र ललितपुरबाट ६ जना उम्मेदवार ३० वर्षभन्दा कम उमेरका छन् । यस्तै, काभ्रेबाट दुई जना, सिन्धुपाल्चोकबाट १ जना, चितवनबाट ७ जनाको उम्मेदवारी परेको छ ।

यसैगरी, गोरखाबाट ३ जना, लमजुङबाट १ जना, कास्कीबाट २ जना, स्याङजाबाट १ जना, नवलपरासी बर्दाघाट सुस्ता पूर्वबाट १ जनाको उम्मेदवार परेको छ । मुस्ताङबाट २ जना, म्याग्दीबाट २ जना, गुल्मीबाट २ जना उम्मेदवार रहेका छन् । गण्डकी प्रदेशका मनाङ, बाग्लुङ तनहुँ र पर्वत जिल्लामा भने कसैको उम्मेदवारी परेको छैन ।

लुम्बिनी प्रदेशको १२ जिल्लामध्ये पाल्पाबाट २ जना, रुपन्देहीबाट ९ जना, कपिलवस्तुबाट ६ जना उम्मेदवार छन् । त्यसैगरी, दाङबाट तीन जना, बाँकेबाट १ जना, बर्दियाबाट २ जना र नवलपरासी बर्दघाट सुस्ता पश्चिमबाट ५ जनाको उम्मेदवारी परेको छ । प्रदेशको अर्घाखाँची, प्युठान, रोल्पा र रुकुम पुर्वीबाट ३० वर्षभन्दा कम उमेरको उम्मेदवारी परेको छैन ।

कर्णाली प्रदेशको सल्यान, जुम्ला, हुम्ला, दैलेख र रुकुम पश्चिमबाट ५ जनाको उम्मेदवार परेको छ । प्रदेशको जाजरकोट, डोल्पा, मुगु, सुर्खेत र कालिकोट जिल्लामा भने ३० वर्षदेखि कम उमेर समूहको उम्मेदवारी परेको छैन ।

सुदूरपश्चिम प्रदेशको ९ जिल्लामा बझाङ, डोटीबाट २ जनाको उम्मेदवारी परेको छ । त्यसैगरी कैलालीबाट तीन जना, कञ्चनपुरबाट दुई जना ३० वर्षभन्दा कम उमेरका उम्मेदवार चुनावी मैदानमा छन् । प्रदेशको अछाम, बाजुरा, डडेल्धुरा, बैतडी र दार्चुला गरी ५ जिल्लामा युवा उम्मेदवारको उम्मेदवारी परेको छैन् ।