काठमाडौँ । आगामी मंसिर ४ गते हुने प्रतिनिधिसभा निर्वाचनमा बारा ४ बाट उम्मेदवारी दिएका पूर्वमन्त्री कृष्ण कमुार श्रेष्ठले आफूलाई मत दिन नपाउने भएका छन् ।
उनको मतदाता नामावली तनहुँको ब्यास नगरपालिका ४ दमौलीमा रहेकोले आफूलाई मतदान गर्न नपाउने भएका हुन् ।
प्रत्यक्षतर्फ मतदानका लागि सम्बन्धित मतदान केन्द्रमै पुग्नु पर्ने कानूनी व्यवस्था रहेकाले उनले बाराबाट मतदान गर्न नपाउने निर्वाचन आयोगले जनाएको छ ।
पूर्वमन्त्रीसमेत रहेका श्रेष्ठको मतदान केन्द्र ब्यास नगरपालिका ४ दमौलीको मदरसा आधारभूत विद्यालय साखरमा रहेकाले उनले प्रत्यक्षतर्फका उम्मेदवारलाई मत दिने हो भने तनहुँमा जानु पर्नेसमेत आयोगले जनाएको छ
बारा निर्वाचन ४ बाट उम्मेदवारी दिएका उनी यसपटक भने मतदान गर्न तनहुँ पुग्न नसक्ने देखिएको छ । नेता श्रेष्ठले आफू बारा आएर चुनाव लड्ने वा तनहुँमा लड्ने भन्ने निधो नभइसकेकाले मतदाता नामावली सार्न नसकिएको र यस पटक आफू मतदानबाट बञ्चित हुनु परेको बताए ।
आफ्नो क्षेत्र छाडेर अन्यत्र चुनाव लड्ने नेता श्रेष्ठ एक्ला व्यक्ति होइनन् । श्रेष्ठ जस्तै देशभरका धेरै उम्मेदवारले आफूलाई मत हाल्न नपाउने भएका छन् ।