काठमाडौँ । ‘गल्छी-रसुवागढी सडक योजना’अन्तर्गत नुवाकोटको बेलकोटगढी नगरपालिका ७ बुधसिंहमा पहिरो गएर अवरुद्ध भएको सडक शुक्रबार रातिदेखि सञ्चालनमा आएको छ ।

बिहीबार अपराह्न सुक्खा पहिरो गएसँगै अवरुद्ध भएको सडक २८ घण्टापछि सञ्चालनमा आएको ‘गल्छी-त्रिशूली-मैलुङ-स्याफ्रुबेँसी-रसुवागढी योजना’को कार्यालयका निमित्त प्रमुख रामबिहारी चौधरीले जानकारी दिए ।

उनको अनुसार चारवटा हेभी उपकरणको सहायताले लगातार १४ घण्टाको प्रयासमा सडक सुरु गरिएको हो । ‘सडक माथिबाट आएको ढुङ्गा माटो पन्छाएर तत्कालका लागि सडक खुला गरिएको छ,’ चौधरीले भने, ‘थप पहिरोको जोखिम कायमै भएकाले आउजाउ गर्दा सावधानी अपनाउनु पर्दछ ।’

अवरुद्ध भएको २८ घण्टापछि सडक सुरु भएसँगै नुवाकोट र रसुवाको गन्तव्यमा जान रोकिएका सवारी साधन सञ्चालनमा आएको ट्राफिक प्रहरी कार्यालय नुवाकोटका प्रमुख गुणनिधि खकुरेलले जानकारी दिए ।

उनको अनुसार अझै पनि उक्त स्थानमा पहिरोको जोखिम देखिएकाले ट्राफिक प्रहरीको उपस्थितीमा जोखिम अवस्था हेरेर सवारी साधन आउजाउ गराइएको छ ।

‘गल्छी-देवीघाट सडक खण्ड’अन्तर्गत पर्ने उक्त स्थानमा गएको वर्ष ठूलोभिर काटेर ‘गल्छी-रसुवागढी सडक योजना’अन्तर्गतको दाँयाबाँया ११ मिटरको व्यवस्थित सडक निर्माण गरिएको थियो । सोही समयमा पहिरो गएकाले आकस्मिक नियन्त्रणको काम गरे त्यो प्रभावहीन देखिएको हो ।

‘सडकको करिब पाँच सय मिटर माथिबाट खसेको सुक्खा पहिरोले दायाँबायाँ दुई सय मि सडक जोखिम बनाएको छ,’ योजना कार्यालयका प्रमुख चौधरीले भने, ‘सडकतल त्रिशूली नदी छ, अन्य वैकल्पिक सडक नभएकाले पहिरो रोकथामको लागि विशेष योजना सञ्चालन गर्न रिपोर्ट तयार गर्ने छौँ ।’

‘गल्छी-रसुवागढी सडक योजना’ विस्तारको क्रममा गल्छी, जिलिङ र तिरतिरे भिरमा ठूलो पहिरो उत्पत्ति भएकाले त्यहाँ थप ठेक्का लगाएर नियन्त्रणको काम भइरहेको छ ।