सुनसरी- बराहक्षेत्र नगरपालिकामा माओवादी केन्द्र परित्याग गरी अध्यक्षसहित सिंगो पार्टी कमिटी स्वतन्त्र भएको छ। माओवादीका अध्यक्ष रहेका कमल कटुवालले पार्टी परित्याग गरी सुनसरी क्षेत्र नम्बर १ को ‘ख’ प्रदेश सभाका लागि उम्मेदवारी घोषणा गरेका छन्।
शुक्रबार बराहक्षेत्र-२ हाटखोलामा भेलाको आयोजना गरी घोषणा सभा गरिएको छ। माओवादी परित्याग गरी स्वतन्त्र भएको समूहले सुनसरी क्षेत्र नम्बर १ बाट स्वतन्त्र उम्मेदवारी दिएका कुमार कार्कीको समर्थन लिएको छ।
कार्की नेपाल बसोबास बस्ती संरक्षण समाजका केन्द्रीय अध्यक्ष हुन्। उनले भूमिहीन सुकुम्बासीलाई स्थायी लालपूर्जाको व्यवस्था गर्नुपर्ने मागसहित स्वतन्त्र उम्मेदवारी दिएको बताउँदै आएका छन्।
कमल कटुवालसँगै बराहक्षेत्रको माओवादी केन्द्रको सिंगो टिम नै स्वतन्त्र उम्मेदवारको पक्षमा लागेको छ। यसअघि स्थानीय तहको निर्वाचनमा समेत माओवादी परित्याग गरी बराहक्षेत्रको नगर प्रमुखमा रामबहादुर बिष्टले उम्मेदवारी दिएका थिए। यस्तै, बराहक्षेत्र-१ को वडाध्यक्षका लागि रञ्जित लोहनीले उम्मेदवारी दिएका थिए।
सुनसरीको धरान उपमहानगरपालिकाको मेयरमा हर्क साम्पाङ स्वतन्त्र ढंगले विजयी भएपछि स्वतन्त्र उम्मेदवारको क्रेज बढ्दै गएको छ। सुनसरीका विभिन्न स्थानमा उम्मेदवारी घोषणाको लहर चलिरहेको छ।
धरानमा खानेपानी समस्याको एउटै मुद्दाले चुनाव जितेका हर्क साम्पाङभन्दा आफूहरूको बलियो मुद्दा रहेको सुनसरी क्षेत्र नम्बर १ मा उम्मेदवारी घोषणा गरेका कुमार कार्की बताउँछन्।
आफ्नो विजयका लागि ठोस मुद्दा रहेको सुकुम्बासी नेता तथा स्वतन्त्र उम्मेदवार कार्कीको दाबी छ। हर्क साम्पाङलाई विजयी बनाउन भूमिहीन सुकुम्बासीले सहयोग गरेकाले आफूहरूलाई समेत उनको समर्थन प्राप्त हुने उम्मेदवारहरूको विश्वास देखिन्छ।