काठमाडौँ । सत्तारुढ दल नेपाली कांग्रेसका महामन्त्री गगन थापाले डेंगुको महामारी नियन्त्रण गर्न सरकारले काम नगरेको आरोप लगाएका छन् ।
आज पार्टी प्रवेश कार्यक्रममा बोल्दै महामन्त्री थापाले डेंगु महामारी रोक्न सरकार पटक्कै काम नगरेको भन्दै असन्तुष्टि व्यक्त गरेका हुन् ।
‘यत्रो डेंगु लागेको बेलामा नेपाल सरकारले जुन प्राथमिकताका साथ लाग्नु पर्ने हो, काम गर्ने पर्ने हो, पटक्कै काम गरेको छैन, यसमा हाम्रो ठूलो असन्तुष्टि छ, काम गरेको चित्त बुझ्दो छैन,’ उनले भने ।
उनले कोरोना संक्रमणको बेला तत्कालीन एमालेको सरकारलाई जसरी काम गर्नु पर्ने थियो त्यसरी काम गरेन भनेर भने पनि आज आफ्नै सरकारविरुद्ध समेत भन्नु परेको बताए ।
‘सरकार कसैको हुँदैन, सरकार जनताको हो, मूल काम त प्रधानमन्त्रीले तत्काल आपत कालीन समिति बनाए डेंगु तुरुन्त कसरी घटाउने अस्पतालमा भएको चाप घटाउन सरकार लाग्नु पर्छ, सरकार अरु काममा अल्झेर यो जिम्मेवारीबाट भाग्न हुँदैन,’ उनले भने ।