रुपन्देही । जिल्लामा सडक दुर्घटनाबाट हुने मृत्युदर वृद्धि भएको छ । जिल्ला ट्राफिक प्रहरी कार्यालय रुपन्देहीको तथ्याङ्कअनुसार दुर्घटनाबाट मृत्यु हुनेको दर वर्षेनी बढ्दै गएको हो ।
आर्थिक वर्ष २०७८-८९ मा जिल्लामा १७२ दुर्घटना हुँदा ९४ जनाको मृत्यु भएको जिल्ला कार्यालयको तथ्याङ्कमा देखिन्छ । सोही अवधिमा दुर्घटनाबाट १७१ जना गम्भीर र ५९ जना सामान्य घाइते भएका छन् ।
गत आव २०७७-७८ मा १६२ दुर्घटना हुँदा ८२ जनाको मृत्यु भएको थियो । यो चालु आवभन्दा कम दुर्घटना हो । आव २०७६-७७ मा १९४ दुर्घटना हुँदा ८० जनाको मृत्यु भएको जिल्ला ट्राफिक प्रहरी कार्यालय रुपन्देहीको तथ्याङ्कले देखाएको छ ।
उनका अनुसार मादक पर्दाथ सेवन गरेर सवारी चलाउँदा, सवारीलाई ओभरटेक गर्न खोज्ने, यान्त्रिक गडबडी, तीव्र गतिमा सवारी चलाउँदा, सडक चौपायाले झुक्याँउदा, क्षमताभन्दा बढी यात्रु बोकेर सवारी चलाउँदा, ट्राफिक नियम उल्लङ्घन गर्दा, बढ्दो सवारी चापका कारण दुर्घटना हुँदा मानिसको मृत्युदर बढेको हो ।
दुर्घटनाको अनुसन्धान गर्दा जिल्लामा भएका अधिकांश सवारी दुर्घटनामा चालककै गल्तीले हुने गरेको जिल्ला ट्राफिक प्रहरी कार्यालयका प्रहरी निरीक्षक केशव के.सी.ले बताउँछन् ।
रुपन्देही जिल्लामा सबैभन्दा बढी दुर्घटना मोटरसाइकल, साना चार पाङ्ग्रे सवारी साधन, यात्रुवाहक बस र टिपर रहेका छन् । यसबाहेक अटो, रिक्सा, साइकलयात्री पनि दुर्घटनामा परेर ज्यान गुमाउनु परेको कार्यालयको तथ्याङ्कमा उल्लेख छ ।