सुनसरी : बराहक्षेत्र नगरपालिका-१ चतराघाटदेखि कोप्चेसम्म हिउँदको समयमा चल्दै आएको जेट बोट भोलि बुधबारदेखि दशैं अवधिभरका पुनः सञ्चालन हुने भएको छ।
सप्तकोशी किनारस्थित बराहक्षेत्र मन्दिरबाट जेट बोड सञ्चालन हुने बराहक्षेत्र मरिन एन्ड रिसोर्ट जेट बोटका सञ्चालक नवीन पौडेलले जानकारी दिए। दशैं तिहारलक्षित गरी यात्रुहरूलाई सहजताका साथ आफ्नो गन्तव्यस्थल पुग्नका लागि जेट बोट सञ्चालनमा ल्याउने तयारी गरिएको उनले बताए।
त्यसका लागि मंगलबार कोप्चेसम्म जेट बोट परीक्षण गरिएकोमा सफलतापूर्वक परीक्षण गरिएको छ। बुधबारदेखि सेवालाई निरन्तरता दिइने उनले बताए।
बराहक्षेत्रबाट कोप्चेसम्मका जेट बोटको हालको भाडा दर जनही ६०० रुपैयाँ कायम गरिएको छ। पानी सतह घटेपछि भाडादरमा समायोजन गरिने पौडेलले जानकारी दिए।
बराहक्षेत्रबाट जेट बोट सञ्चालन भएपछि भोजपुरको दक्षिणी क्षेत्र, धनकुटाको सिम्ले, अखुवाटार, त्रिवेणी, साङ्मालगायत ठाउँहरूमा समयमा छोटो दूरीमा पुग्न सकिन्छ।
पौडेलका अनुसार जेट बोटको क्षमता ४० सिट छ। ‘नेपालीहरूको महान चाड दशैंमा आफ्नो थातथलो फर्किने यात्रुको बढी हुन्छ,’ उनले भने, ‘उहाँहरूलाई सुरक्षित साथ आ–आफ्नो गन्तव्यसम्म पुग्नका लागि दशैं अवधिभर बराहक्षेत्रबाट जेट बोट सञ्चालन गर्दैछौं।’
पानीको बहाव कम भएपछि पुनः चतराघाटबाट जेट बोट सञ्चालन गर्ने उनको योजना छ। सप्तकोशी नदीमा हिउँदको समयमा बराहक्षेत्र मरिन एन्ड रिसोर्ट, सप्तकोसी टुरिजम एन्ड वाटर ट्रान्सपोर्टेसन, नेपाल रिभर ट्रान्सपोर्ट प्रालि, बराहक्षेत्र जल यातायात तथा पर्यटन सेवा प्रालि गरी चारवटा कम्पनीले तीनवटा लामो दूरीका र चारवटा छोटो दूरीका जेट बोट सञ्चालन गर्दै आएका छन्।