काठमाडौँ । निलम्बित प्रधानन्यायाधीश चोलेन्द्र शमशेर जबराले आफूले कसैको एक कप चियासमेत नखाएको बताएका छन् । महाभियोग सिफारिस समितिसँग बयानका क्रममा उनले आफूले कसैको एक कप चियासमेत नखाएको दाबी गरेका हुन् ।

‘म न्यायाधीश बनेपछि कुनै वकिलसँग बसेर एक कप चियासमेत खाएको छैन,’ सोमबार समितिले सोधेको प्रश्नमा उनले भने, ‘म प्रधानन्यायाधीश बनेपछि झन न कोही न्यायाधीशलाई फोन गरे, न उनीहरूसँग बसेर चियाँ खाएँ ।’

आफूले न्यायापालिकामा एक रुपैयाँ भ्रष्टाचार नगरेको दाबी गर्दै उनले कसैसँग अनैतिक काम नगरेको बताए । प्रतिनिधिसभाको कार्यकाल केही दिनपछि सकिने भएकाले समितिले सोमबार नै बयान लिएर काम सकेको हो ।