सुनसरी- १९ भदौमा झुण्डिएको अवस्थामा फेला परेकी नाबालिकाको हत्या आशंकामा प्रहरीले उनकै ठूलो बुवा र ठूली आमालाई पक्राउ गरेको छ।
उनी ठूली आमाको घरमा सलको पासो लगाएको मृत अवस्थामा फेला परेकी थिइन्। लासको प्रकृति हेर्दा १३ वर्षीया विपिना पाँचकोटीको हत्या भएको आशंका गर्दै स्थानीय बासिन्दाले घटनाको गम्भीरतापूर्वक अनुसन्धान गर्न प्रहरीलाई दबाब दिएका थिए।
उनी स्थानीय आदर्श माविमा कक्षा ८ मा अध्ययनरत थिइन्। उनी बराहक्षेत्र २ स्थित आफ्नै ठूली आमा गीता दर्जी र ठूलो बुवा प्रदीप दर्जीको घरमा बस्दै आएकी थिइन्। उनका बाबुको मृत्यु भइसकेको छ। विदेशमा रोजगारीमा रहेकी आमा मुना छोरीको मृत्युको खबर सुनेर घर आएकी छन्।
विपिनाको सम्पत्ति हडप्ने उद्देश्यले हत्या गरिएको हुन सक्ने आशंका स्थानीय बासिन्दाको छ। स्थानीय बासिन्दाको व्यापक दबाबपछि इलाका प्रहरी कार्यालय चतराले अनुसन्धानका लागि ठूलो बुवा प्रदीप र ठूली आमा गीतालाई पक्राउ गरी अनुसन्धान अगाडि बढाएको छ।