जुम्ला- स्याउ सुपरजोन भनेर चिनिएको जुम्लाले यस वर्ष ठूलो परिमाणमा स्याउ उत्पादन गरेको छ। कृषि विकास कार्यालय जुम्लाका अनुसार जिल्लाका आठै स्थानीय तहले राम्रो स्याउ फलाएका छन्।
धेरै किसानले स्याउ टिपेर पनि बिक्री राम्रै आम्दानी लगिसकेका छन्। स्याउ व्यापारीको हतारोका कारण केही कृषकले स्याउ गुलियो, पोटिलो र परिपक्व नहुँदै टिपेर बिक्री गर्दा त्यसको परिमाणमा कमी आएको छ। यद्यपि, विगतभन्दा यस वर्ष स्याउ उत्पादनमा राम्रो वृद्धि भएको कृषि विकास कार्यालय जुम्लाका निमित्त प्रमुख गणेशबहादुर अधिकारीले जानकारी दिए।
उनका अनुसार चार हजार १२० हेक्टरमा स्याउखेती हुँदा २९ हेक्टरमा १८ हजार मेट्रिक टन स्याउ स्याउ फलेको अनुमान छ। ‘त्यसमा ५० प्रतिशत परिमाण घटाउँदा नौ हजार मेट्रिकटन स्याउप्रति किलो ५५ रुपैयाँका दरले बाहिर निर्यात हुँदा जुम्लालाई करिब ५० करोड आम्दानी हुन्छ,’ उनले भने, ‘तत्कालै शीत भण्डारको व्यवस्था नहुँदा अझै किसानले बढी लाभ लिन नपाउने अवस्था यथावतै छ।’
स्याउ निर्यातको तथ्यांक राख्न कालीकोट र जुम्लाको सीमामा रहेको नाग्म प्रहरीलाई जिम्मा दिइएको उनले बताए। यस्तै, जुम्ला विमानस्थलबाट बाहिरिने स्याउको तथ्यांक संकलन गर्न विमानस्थल प्रहरीलाई जिम्मा दिइएको छ। खास स्याउ कति परिमाणमा बाहिरियो भन्ने पूर्ण तथ्यांक आउन भने केही समय लाग्ने छ।
जुम्लामा अहिले ग्रेड सी लेभलको स्याउ प्रतिकिलो ४० र ए ग्रेडको प्रतिकिलो ६० रुपैयाँभन्दा बढीमा बिक्री भइरहेको छ। कार्यालय प्रमुख अधिकारीका अनुसार सहजकर्ता, थोक बिक्रेता हुँदै खुद्रा व्यापारी भएर स्याउ बजारमा जानुपर्नेमा स्याउ कृषक स्वयं व्यापारी बन्दा उनीहरूले अपेक्षाकृत मूल्य पाउनेभन्दा दुःख बढी बेहोरेका छन्।