काठमाडौँ । नेपालमा भारतबाट बेच्न ल्याइएका पेस्तोल र रिभल्बरसहित एक जनालाई सशस्त्र प्रहरी बल बोर्डर आउट पोष्ट (बीओपी) सिक्टी मोरङको टोलीले पक्राउ गरेको छ ।

उक्त हतियार किन्न खोज्ने अर्का एक व्यक्तिलाई समेत सशस्त्र प्रहरी टोलीले पक्राउ गरेको छ । पक्राउ पर्नेमा सुनवर्षी नगरपालिका ८ का २८ वर्षीय आरिफ आलम र उर्लाबारी नगरपालिका ६ बस्ने २९ वर्षीय नविन धिमाल रहेका छन् ।

बीओपी सिक्टी मोरङका सशस्त्र प्रहरी निरीक्षक नम प्रभाव राई नेतृत्वको टोलीले उनीहरूलाई हतियारसहित पक्राउ गरी रंगेली प्रहरीमा बुझाएको छ ।

सशस्त्र प्रहरी निरीक्षक राई नेतृत्वको टोलीले भारतबाट नेपालतर्फ आइरहेको मोटरसाइकलमा सवार आलमलाई शंका लागेर जाँच गरेको थियो ।