काठमाडौँ । नेपाली कांग्रेसका नेता प्रकाशमान सिंहले इन्धनको मूल्य वृद्धि नियन्त्रणमा सरकारले ध्यान दिनु पर्ने बताएका छन् । महँगीको मारमा परेका जनतालाई राहत दिन सरकारले चाहेमा मूल्य वृद्धि नियन्त्रण गर्न सक्ने उनले बताए ।
शनिबार बिहान काठमाडौं महानगर १० मा आयोजित सामुदायिक सभा हल उद्घाटन कार्यक्रममा बोल्दै नेता सिंहले स्वचालित मूल्य प्रणाली लागू गरेर इन्धनको मूल्य समायोजन गर्नु पर्ने बताए ।
इन्धनको मूल्य समायोजनप्रति आफ्नै पार्टी नेपाली कांग्रेस नेतृत्वको सरकारको ध्यानाकर्षण गराउँदै उनले भने, ‘अटोमेटिक प्राइसिङ सिस्टम त छँदै छ, उपभोक्तालाई मारमा पार्दिनु भएन, सरकारले अलिकति पहल गर्नु पर्यो ।’
‘स्वचालित मूल्य प्रणाली लागू गरिए पनि अन्तर्राष्ट्रिय बजारमा तीन पटकसम्म इन्धनको मूल्य घट्दासमेत नेपाल आयल निगमले मूल्य घटाएको छैन, यसबाट सरकारको आलोचना भइरहेको छ,’ उनले भने ।
यस्तै, उनले सरकारका काम कारबाही तल्लो तहका समुदायले राहत महसुस गर्नु पर्ने खालको हुनु पर्ने बताए । काठमाडौं उपत्यकाको फोहोर व्यवस्थापनको काममा पनि समुदायलाई सहभागी गराउनु पर्ने उनको मत छ । उनले काठमाडौं महानगरलाई फोहोरको दीर्घकालीन व्यवस्थापनको उपाय खोज्न सुझाव दिए ।