काठमाडौँ । साउदी अरबको अदालतले एक महिलालाई उनको ट्विटर गतिविधिलाई लिएर ३४ वर्षको जेल सजाय सुनाएको छ । राज्यमा ‘सार्वजनिक व्यवस्थामा बाधा पुर्‍याउन’ खोज्ने असन्तुष्टलाई सहयोग गरेको आरोपमा सलमा अल शेहाबविरुद्ध साउदीको पुनरावेदन अदालतले ९ अगस्टमा उक्त सजाय सुनाएको हो ।

बेलायतको युनिभर्सिटी अफ लिड्समा पीएचडी अध्ययनरत तथा दुई सन्तानकी आमा शेहाबलाई थप ३४ वर्षसम्म विदेश भ्रमणमा प्रतिबन्ध लगाइएको छ । ट्वीटरमा लगभग २६ सय फलोअर भएका उनले रूढिवादी सुन्नी मुस्लिम देशमा महिला अधिकारका बारेमा बारम्बार ट्वीट गर्दै आएकी थिएन् ।

यो सजाय खाडी देशमा अधिकारकर्मीमाथिको दमनबीचमा आएको छ । उनीमध्ये धेरैलाई जेल सजाय र यात्रा प्रतिबन्ध लगाइएको छ । बेलायतबाट साउदीमा बिदा मनाउने क्रममा शेहाबलाई सन् २०२१ को जनवरीमा पक्राउ गरिएको थियो ।