काठमाडौं– अन्तर्राष्ट्रिय फुटबलको सर्वोच्च निकाय फिफाले भारतीय फुटबल महासंघलाई तत्काल निलम्बन गरेको छ ।
फिफाले तेस्रो पक्षको हस्तक्षेपका कारण भारतीय फुटबल महासंघ (एआईएफएफ)विरुद्ध कारबाही गरेको हो ।
फिफाले जारी गरेको विज्ञप्तिमा काउन्सिलले सर्वसम्मतिले भारतीय फुटबल संघलाई निलम्बन गर्ने निर्णय गरेको जनाएको छ । फिफाले भारतीय फुटबलमा तेस्रो पक्षको हस्तक्षेप रहेको र उक्त कार्यले फिफाको नियमहरूको गम्भीर उल्लङ्घन भएको बताएको छ ।
फिफाको विज्ञप्ति अनुसार उक्त निर्णयले भारतबाट यसै वर्ष आयोजना हुने यू–१७ महिला फुटबल विश्वकपको आयोजना पनि खोसिएको छ । यो प्रतियोगिता ११–३० अक्टोबरसम्म भारतका विभिन्न राज्यमा आयोजना हुने तय थियो ।
फिफाले यो निलम्बन तत्काल लागू हुने जनाएको छ । यस महिनाको शुरुमै फिफाले भारतीय फुटबललाई निलम्बनको चेतावनी दिएको थियो। फिफाले विज्ञप्तिमा एआईएफएफका अधिकारीहरूको दैनिक कामकाजमा पूर्ण नियन्त्रण भएपछि मात्र यो निलम्बन फिर्ता लिने बताएको छ।
सञ्चार माध्यमका अनुसार अहिलेसम्म एआईएफएफ एउटा समितिद्वारा सञ्चालित छ। पूर्व प्रमुख प्रफुल्ल पटेलको कार्यकाल सकिएको भए पनि निर्वाचन नगरी पद ओगटी बसेका छन् ।