काठमाडौँ । इलाका प्रहरी कार्यालय कोहलपुरको मुद्दा शाखामा कार्यरत असईविरुद्ध बलात्कारको मुद्दा दर्ता भएको छ । असई प्रविण चौलागाईविरुद्ध बलात्कार मुद्दा दर्ता भएको हो ।

शनिबार पीडित महिलाले आफ्नो आमाबुवासँगै आएर असई चौलागाईविरुद्ध बलात्कार मुद्दा दायर गरेकी हुन् । गत साउन ११ गते बहुबिवाह मुद्दामा पक्राउपछि इलाका प्रहरी कार्यालय कोहलपुरको हिरासतमा राखिएकी एक महिलालाई शुक्रबार बिहान २ बजे (मध्यराति) चौलागाईले आफ्नो कोठामा लगेका थिए । सोही क्रममा उनले महिलामाथि यौन दुर्व्यवहार तथा बलात्कार गरेको आरोप लागेको छ ।

चौलागाईंले डिउटीका प्रहरीलाई भनेर महिलालाई मध्यरातमा आफ्नो कोठामा लगेका थिए । हिरासतका रहेका अरूले मध्यरातमै होहल्ला गरी विरोध गरेका थिए ।

असई चौलागाईंलाई थुनामा राखेर अनुसन्धान भइरहेको प्रहरीले जनाएको छ ।