काठमाडौं- इराकको राजधानी बगदादमा उच्च सुरक्षा क्षेत्र तोडेर प्रदर्शनकारीहरू संसद भवनभित्र प्रवेश गरेका छन्।
धर्मगुरु मुक्तदा अल–सदरका समर्थकहरूले प्रधानमन्त्रीमा विपक्षी उम्मेदवारको विरोधमा प्रदर्शन गरिरहेका छन्।
गत अक्टोबरमा भएको आम निर्वाचनमा सदरको पार्टीले सबैभन्दा धेरै सिट जिते पनि सरकार बनाउन सकेको छैन।
संसद भवन प्रवेश गरेका प्रदर्शनकारीहरूलाई प्रहरीले अश्रुग्यास र पानीको फोहरा प्रयोग गरेर रोक्ने प्रयास गरेको थियो।
प्रदर्शनकारी प्रवेश गर्दा संसद भवनमा कुनै पनि सांसद उपस्थित थिएनन्।
प्रदर्शनकारीहरूको भीड सुरक्षाकर्मीहरूको बाक्लो उपस्थिति रहने ग्रिन जोनमा प्रवेश गरेको थियो।
यस क्षेत्रमा विभिन्न देशका दूतावाससहित राजधानीनका महत्वपूर्ण भवनहरू छन्।
सुरक्षाकर्मीले संसद भवन प्रवेश गर्न खोज्नेहरूलाई केही बेर रोके पनि ठूलो भीड भवनभित्र छिरेको सुरक्षा स्रोतलाई उद्धृत गर्दै एएफपीले जनाएको छ।
इराकका प्रधानमन्त्री मुस्तफा अल–खादिमले प्रदर्शनकारीहरूलाई संसद भवन छोड्न भनेका छन्।
भवनभित्र छिरेका प्रदर्शनकारीहरू नाचगान गर्दै टुबुलमा सुतेका थिए। ९ महिना लामो गतिरोधपछि त्यहाँ अशान्ति सुरू भएको हो।
त्यहाँ देशका विभिन्न राजनीतिक समूहहरूबीचको विवादका कारण निर्वाचनपछि नयाँ सरकार गठन हुनसकेको छैन।
इराकमा अमेरिकी हस्तक्षेपको विरोध गर्दै आइरहेका शिया धर्मगुरु सदरको दलले अक्टोबरको निर्वाचनमा जित भएको दाबी गरेको थियो।
तर, आफ्ना प्रतिद्वन्द्वीसँग सहकार्य गर्न सदर तयार नभएपछि उनको दलले सरकार निर्माणका लागि गठबन्धन बनाउन सकेको छैन।