काठमाडौँ । रुपन्देही ट्राफिक प्रहरीले दुर्घटनामा ९४ जनाको मृत्यु भएको जनाएको छ । एक वर्षको अवधिमा १७२ वटा दुर्घटना हुँदा ९४ जनाको मृत्यु भएको हो ।
अधिकांश दुर्घटना बेलुका ६ बजेपछि मध्यरात १२ बजेको समयमा हुने गरेको कार्यालयले जनाएको छ । दुर्घटना तथा त्यसबाट हुने क्षति न्यूनीकरणका लागि विभिन्न कार्य गर्दै आए पनि दुर्घटना बढी रहेको छ,’ ट्राफिक प्रहरी कार्यालय रुपन्देहीका प्रमुख प्रहरी निरीक्षक केशव केसीले बताए ।
चालकको गल्तीका कारण धेरै सवारी दुर्घटना भएको अनुसन्धानले देखाएको छ । तीव्र गतिका कारण मादक पदार्थ सेवन गरेर सवारी चलाउँदा, ओभरटेक गर्दा, यान्त्रिक गढबढी (ब्रेकफेल, स्टेयरिङ फेल) जस्ता कारण, यात्रुको गल्ती, सडक चौपाया र सडकको अवस्थाका कारणले पनि दुर्घटना भएको ट्राफिक प्रहरी कार्यालयले जनाएको छ ।
गत वर्ष तीव्र गतिका कारण एक सय ५२ वटा दुर्घटना हुँदा चालकको लापरबाहीले नौ दुर्घटना भएको थियो । यात्रुको गल्तीले तीन र यान्त्रिक गडवडीले दुई वटा दुर्घटना भएको थियो । गत आर्थिक वर्षमा कार्यालयका अनुसार एक सय ४८ मोटरसाइकल र स्कुटर दुर्घटनामा परेका थिए ।
सवारी दुर्घटना हुँदा घाइतेको संख्यामा पनि वृद्धि भएको छ । आर्थिक वर्ष ०७८–७९ मा दुर्घटनाबाट एक सय ७१ जना गम्भीर घाइते र ५९ जना साधारण घाइते भएका छन् ।