काठमाडौँ । म्याग्दीमा चार वर्षको अवधिमा पाँच हजारभन्दा बढी घरमा खानेपानीको सुविधा पुर्याइएको छ । ‘एक घर एक धारा’ कार्यक्रमअन्तर्गत खानेपानीको सुविधा विस्तार भएको हो ।
गण्डकी प्रदेश सरकारले सुरुवात गरेको हरेक घरमा खानेपानी पुर्याउने अभियानअन्तर्गत हालसम्म पाँच हजार १३७ घरमा खानेपानी पुर्याइएको खानेपानी, जलस्रोत तथा सिँचाइ विकास डिभिजन कार्यालयका प्रमुख सुरेन्द्र पौडेलले जानकारी दिए । १४ वटा खानेपानी योजनामार्फत धारा निर्माण गरिएको हो ।
आर्थिक वर्ष २०७८–७९ मा एक हजार ३४७ घरमा धारा निर्माण गरिएको छ । ‘स्थानीयवासीले स्वच्छ र सफा खानेपानी उपभोग गर्न पाएका छन्,’ पौडेलले भने । विसं २०७५ देखि गण्डकी प्रदेश सरकारले हरेक घरमा सफा र स्वच्छ खानेपानी सुविधा विस्तार गर्न ‘एक घर एक धारा’ कार्यक्रम अघि सारेको हो ।
जिल्लाभर २९ हजार ४९९ घरमा आधारभूत खानेपानीको पहुँच पुगेको पौडेल बताउँछन् । आयोजनाले ९६ प्रतिशत घरमा आधारभूत खानेपानीको पहुँच पुर्याउने लक्ष्य लिएको छ ।
प्रदेश सरकारको बजेटबाट अन्नपूर्ण गाउँपालिका ८ मा थावन खानेपानी योजना, रघुगंगा गाउँपालिका १ मा बेगखोला खानेपानी योजना, बेनी नगरपालिका ९ मा गलेश्वर पम्पिङ खानेपानी योजना, निलदह खानेपानी योजना र वडा नं ४ मा सिंगा खानेपानी योजना सम्पन्न भई घरघरमा धारा निर्माण गरिएका छन् ।
यस्तै, अन्नपूर्ण गाउँपालिका ६ मा घारा खानेपानी योजना सम्पन्न भएको छ । मंगला गाउँपालिका २ मा हिदी खानेपानी योजना, वडा नं १ मा कुहुँ खानेपानी योजना र मालिका गाउँपालिका २ रुममा सेतखोला खानेपानी योजना सम्पन्न भएको इञ्जिनियर राजेश उलकले जानकारी दिए ।
त्यसैगरी बेनी नगरपालिका २ मा ज्यामरुककोट अर्जम रत्नेचौर खानेपानी योजना र मालिका गाउँपालिका ५ मा देवीस्थान खानेपानी योजना सम्पन्न भएको छ । मंगला गाउँपालिका १ मा भर्जुला सल्यान खानेपानी योजना र अन्नपूर्ण गाउँपालिका ६ घारामा नेपाने खोनेपानी योजना सम्पन्न भएको छ ।
जिल्लामा संघीय सरकारबाट प्रदेशमा हस्तान्तरण भएका १० र प्रदेश सरकारका २२ खानेपानी योजना सञ्चालित छन् । संघीय सरकारबाट हस्तान्तरण भएका दुई सम्पन्न तथा ८ योजना निर्माणाधीन अवस्थामा रहेको कार्यालयले जनाएको छ । प्रदेश सरकारका १८ योजना हाल निर्माणाधीन अवस्थामा छन् ।