सिलोङ- भारतको मेघालयमा भाजपाका नेताले आफ्नो फार्म हाउसमा वेश्यालय चलाएको खुलासा भएको छ। उनको वेश्यालयमा छापा मारेर प्रहरीले ६ नाबालिकाको उद्धार गरेको छ भने ७३ जनालाई पक्राउ गरेको छ।
मेघालय प्रहरीले वेस्ट गारो हिल्स जिल्लाको सदरमुकाम तुराको बाहिरी इलाकास्थित फार्म हाउसमा छापा मारेको हो। उक्त फार्म हाउसमा भाजपाका नेताले वेश्यालय चलाएका थिए।
उक्त फार्म हाउसका मालिक भाजपा नेता बर्नार्ड एन मराक उर्फ रिम्पू हुन्। उनी भाजपाको मेघालय प्रदेश उपाध्यक्ष हुन्। र, गारो हिल्स स्वायत्त जिल्ला परिषद सदस्य पनि हुन्।
प्रहरीका अनुसार सन् २०२० देखि उक्त वेश्यालय सञ्चालनमा रहेको खुलेको छ। फार्म हाउसबाट उद्धार गरिएका ६ नाबालिकमा चार बालक र दुई बालिका छन्। उनीहरूमाथि बाल यौन शोषण भएको खुलेको छ। फार्म हाउसमा रहेको एक बालिकाले आफूमाथि यौन उत्पीडन भएको उल्लेख गर्दै उजुरी दिएकी थिइन्। सोही उजुरीका आधारमा प्रहरीले छापा मारेको हो।
फार्म हाउसबाट ग्राहक ओसार्न प्रयोग हुने २७ वटा गाडी, ३० हजार रुपैयाँ नगद, पाँच सय प्याकेट कन्डोम र ४०० वटा रक्सीका बोतल बरामद गरेको छ। प्रहरीले छापा मार्दा धेरै युवा-युवती नांगै थिए। र, मदिरा सेवन गरिरहेका थिए।
फार्म हाउसको तीनतले घरमा ३० वटा कोठा छन्। तिनै कोठामा भाजपा नेता मराकले वेश्यालय चलाएका थिए। प्रहरीले फार्म हाउसका म्यानेजर, केयर टेकर र तीन कर्मचारलाई पक्राउ गरेको छ। त्यसका मालिक मराक भने फरार छन्। उनलाई तत्काल आत्मसमर्पण गर्न प्रहरीले सूचना जारी गरेको छ।
मराकले भने उल्टै आफ्नो बदनाम गर्न मेघालयका मुख्यमन्त्री कोनराड संगमाले आफ्नो फार्म हाउसमा छापा मार्न लगाएको दाबी गरेका छन्।
राजनीतिमा आउनुअघि मराक मेघालयको एक अतिवादी संगठनका नेता थिए। अचिक नेसनल भोलुन्टरी काउन्सिल (बी) नामको अतिवादी संगठनका अध्यक्ष छँदा उनीमाथि २५ भन्दा बढी आपराधिक मुद्दा दायर भएका छन्।