कोलकाता- भारतको इन्फोर्समेन्ट निर्देशनालयले पश्चिमबंगालका एक मन्त्रीकी निकटस्थ सहयोगीको घरबाट २० करोड भारतीय रुपैयाँ बरामद गरेको छ।
पश्चिमबंगालका उद्योगमन्त्री पार्थ चटर्जीकी सहयोगी अर्पिता मुखर्जीको घरबाट उक्त नगद बरामद भएको हो। शिक्षक भर्नामा भएको भ्रष्टाचार अनुसन्धानका क्रममा अर्पिताको घरमा निर्देशनालयको टोलीले छापा मारेको थियो।
बरामद भएको रकम एसएससी हिनामिनाको अपराधसँग सम्बन्धित हुन सक्ने निर्देशनालयका अधिकारीहरूको आशंका छ। अर्पिताको घरबाट २० भन्दा बढी मोबाइल फोन पनि बरामद भएको छ। ती फोन कुन कामका लागि प्रयोग हुने गरेका थिए भन्ने अनुसन्धान थालिएको छ।
निर्देशनालयले पश्चिमबंगालका शिक्षा राज्यमन्त्री परेश सी अधिकारी र विधायक माणिक भट्टाचार्यको घरमा पनि छापा मारेको छ। उच्च अदालतको आदेशपछि केन्द्रीय अनुसन्धान ब्युरो (सीबीआई)ले पश्चिमबंगालमा सरकारी तथा सहायताप्राप्त स्कुलहरूमा ग्रुपसी र डीका स्टाफका साथ-साथ शिक्षकहरूको भर्नामा भएको भ्रष्टाचारबारे अनुसन्धान गरिरहेको छ। इन्फोर्समेन्ट निर्देनालयले पनि यस प्रकरणमा अनुसन्धान गरिरहेको छ।
पार्थ चटर्जी अहिले पश्चिमबंगालका उद्योग तथा वाणिज्य मन्त्री छन्। तर, शिक्षक घोटाला प्रकरणका बेला उनी शिक्षामन्त्री थिए। सोही कारण सीबीआई र इन्फोर्समेन्ट निर्देशनालयले उनीमाथि कडा नजर राखेका छन्।