इस्लामावाद- पाकिस्तानको पञ्जाब प्रान्तमा भएको उपचुनावमा इमरान खानको दल पाकिस्तान तहरिक-ए-इन्साफले सानदार जित हात पारेको छ।
२० वटा विधानसभा सिटका लागि भएको चुनावमा १५ सिटमा इमरानको पार्टीले जितेको छ। चुनाव परिणाम घोषणा भएपछि उनले पार्टी कार्यकर्तालाई धन्यवाद दिएका छन्।
यो जितबाट पाकिस्तान मुस्लिम लिग नवाजका उम्मेदवारलाई मात्र नभई पाकिस्तानको राज्यको पूरै मेसिनरीमाथि जित हात लागेको उनको दाबी छ।
मुस्लिम लिगका चार उम्मेदवारले मात्र जितेका छन्। एक सिटमा स्वतन्त्र उम्मेदवार निर्वाचित भएका छन्। पञ्जाबमा पुनः सरकार बनाउन इमरानको पार्टीलाई १४ सिटमा जित्नु आवश्यक थियो।
पञ्जाबमा अहिले मुस्लिम लिगका हमजा शहबाज सरिफ मुख्यमन्त्री छन्। गत अप्रिलमा सरिफ मुख्यमन्त्री बन्ने क्रममा सदनमा भएको मतदानमा फ्लोर क्रस गरेका कारण निर्वाचन आयोगले २० विधायकलाई बर्खास्त गरेको थियो। सोही सिटमा उपचुनाव भएको हो।